DUNA nay upat ka mga tawo nga nagpositibo sa coronavirus disease (Covid-19) sa Northern Mindanao, basi sa gipagawas nga talaan sa Department of Health (DOH).
Gipahibalo ni DOH-Northern Mindanao Director Dr. Adriano Subaan sa press conference kagahapon sa Northmin Task Force for Covid-19 nga nadugangan og tulo ka positibo nga pasyente ang Northern Mindanao as of March 30, 2020.
Gikan sa usa nga taga Cagayan de Oro nadugangan og usa gikan sa Iligan City, laing usa gikan Lanao del Norte ug usa sab sa Misamis Occidental.
Adunay siyam ka laing nagpositibo nga taga gawas sa rehiyon apan dinhi lamang sa Regional Center nagpa-test hinungdan nga13 ang nagpositibo sa ihap.
Sa bag-ong update nga gihatag ni Subaan ang nakadugang nga positibo sa Covid-19 mao kini mosunod:
Unang positibo ang 67 anyos nga babaye nga taga Iligan City, gi admit kini niadtong Marso 19 tungod sa pneumonia ug reklamo nga ubo ug hilanat. Unom ka adlaw sa wala pa kini naadmit nagreklamo kini nga galisod og ginhawa, body malaise ug adunay pre existing nga gibati nga diabetes mellitus type 2 ug hypertension stage 2 ug polycythemia ug dunay history nga nagbiyahe sa Makati City.
Ikaduhang nagpositibo mao ang 45 anyos nga lalaki gikan sa Jimenez, Misamis Occidental, giadmit kini niadtong Marso 24 tungod sa gibati nga hilanat, ubo, sore throat ug sakit sa ulo walo ka adlaw sa wala pa kini naadmit. Ang pasyente adunay daan na nga gibati nga hypertension ug nibiyahe gikan sa Thailand ug Manila.
Ang ikatulo nga nagpositibo usa ka 67 anyos nga lalaki gikan sa Tubod Lanao, del Norte nga giadmit niadtong Marso 26 tungod sa grabeng hilanat, ubo ug sore throat, colds and fatigue sa wala pa ang admisyon niini. Ang pasyente adunay daan na nga gibati nga hypertension, pneumonia ug history sa lung cancer. Sa validation nga gihimo wala kini nakitaan nga nagbiyahe.
Kini nga mga pasyente ang gi-admit sa nagkalain-laing ospital sa Northern Mindanao ug ubos sa maayong pag-atiman.
Matud ni Suba-an nga gihimo nila karon ang contact tracing aning mga nagpositibo.
"Atong gusto nga di mahitabo nag-contact tracing ta aning positive cases. Nagamit ta sa World Health Organization kung unsa ang level sa na expose labina atong health personnel nga nag atiman kay dili tanan na expose automatically nga magkasit sila. Atong gipaningkamotan nga dili local transmission," matud ni Suba-an ug niawhag sa katawhan magkalma apan magbinantayon.