GI-AGHAT sa lokal nga kagamhanan sa siyudad sa Cagayan de Oro pinaagi sa humanitarian assistance cluster nga buksan sa mga hotels ang ilang patigayon alang sa mga health workers labi na sa Northern Mindanao Medical Center (NMMC).
Nakigkoordina na karong panahona ang lokal nga kagamhanan sa siyudad aron nga mahimo na kini sa daling panahon. Plano sa siyudad nga libre kining itanyag alang sa mga health workers.
Gibutyag ni Chaissa Duguilme, cluster head sa humanitarian/donations cluster, nga ilang hangyuon ang mga establisimento sama sa mga hotels nga buksan nila ang ilang pasilidad alang sa mga health workers.
"We want to call them 'Hope.' We also would like to reach out kaning mga accomodation establishments, mga hotels, nga i-open pud nila ang ilahang mga doors for our medical personnel who might need temporary place to stay," matud ni Duguilme.
Gidugang pa nga daghang mga nurses ug doctor/medical technologist nga mahadlok nga mopauli sa ilang mga panimalay gumikan kay dunay masakiton o pamilya nga tigulang na aron malikay sa posibleng pagkuyanap sa coronavirus disease (Covid-19) rason nga nanghinaot nga dunay magtanyag og dapit alang kanila diin matawag nga "half way places."
Giingong duna na sila'y nasugdan apan kung dunay motanyag andam kaayo ang lokal nga kagamhanan sa siyudad.
"Naa nami gisugdan pero kung naay mo offer, naay interesado welcome na sa amoa gyud sa City Government," dugang pa ni Duquilme.
Kini usab isip tabang ug pagsuporta na usab sa mga medical workers sa ilang gihimo aron nga makigbatok niining coronavirus disease (Covid-19) bisan pa man sa ka risgo niini.
"Dili ni for PUMs or PUIs para ni sa medical, so it is our way also of honoring them and acknowledging that what we are doing is really heroism," pahayag ni Duquilme.