HIMUON nga temporaryong medical facilities ang duha ka sporting venues sa Metro Manila aron magamit sa mga pasyente sa coronavirus disease (covid-19).
Gipahibalo ni Philippine Sports Commission (PSC) chairman William Ramirez nga ang Rizal Memorial Sports Complex sa Manila ug Philsports Complex sa Pasig City gi-survey na sa Department of Public Works and Highways alang ning maong lakang.
Dili ikalimod nga naghuot na ang mga pasyente sa Covid-19 sa nagkadaiyang mga ospital.
Alang kang Ramirez dili kini problema gumikan kay ang duha ka dagkong sporting venues gipanag-iya man sa gobiyerno sa nasod.
“They are government facilities so we were already anticipating that it might come to that point,” pasabot ni Ramirez.
Matod ni Ramirez nga nakigsabot na siya kang Executive Secretary Salvador Medialdea kabalhin ning maong plano.
Gawas sa 30 ka mga atleta ug coaches, medical ug admin staff nga motabang ug security personnel nga nagbantay sa duha ka sporting venues complexes, ang tanang national athletes gipapauli una sa ilang tagsatagsa ka mga puy-anan.
Si Senior Executive Assistant and National Training Director Marc Velasco mipasalig nga ang management committee sa PSC nakahan-ay na og mga plano kabahin ning maong lakang. “Thorough disinfection of the venues will be undertaken regularly and after their use,” pasalig ni Velasco.
Giawhag ni Ramirez ang katawhan nga magtinabangay aron hingpit nang masumpo ang Covid-19. “These times call for unselfish patriotism. These times call for everyone to be heroes, even. Let us step up to the plate, so to speak. This is us, the sporting community stepping up to bat,” matod ni Ramirez. (RSC, ESL)