DILI gyod matago nga tanang tawo karong panahona, di man lang sa nasud Pilipinas apan sa tibuok kalibutan ang naglisod, napait, pit-os, hagip-ot sa panudlanan, gumikan sa coronavirus disease (Covid-19) nga mikuyanap sa kalibutan.
Sa Davao Region sagad sa mga kompanya, wala una mikaltas og mga utang sa ilang mga empleyado diha ning kasamtangang payroll ug sa Abril 15, tungod nabati gayod sa mga employer ug sa mga kompanya sa pribado ang gibati sa ilang mga empleyado.
Nalipay tawon ang mga empleyado, kay dako sila og na-take home ning hinapos sa Marso. Maayong kapanaminan ang mga employer ug mga kompanya nga naghimo niini, apan wa sa'y kasingkasing kung maingon ang wala gyod mipatuman niini, labi na niining nasinati nga krisis nga dala sa Covid-19.
Gani sa siyudad sa Davao, ang Davao City Water District (DCWD) nagpahibalo nga puwede ra ning bulana dili una mobayad sa ilang mga bill, agi'g paghatag og simpatiya sa tanan nga mibati sa kalisod, kay nahunong ang pipila sa trabaho, ug ang pagpabilin sa social distancing, aron di magpunsisok sa pagbayad sa ilang buhatan.
Ang Davao Light and Power Company (DLPC) mao sab ang sistema nga gipatuman, nagpasalamat ang dunay tagduha na ka bulan nga bill, kay di pa sila maputlan bisan og dili una mabayran ang previous amount.
Gani ang mga Indians "Torko" wala una nangulekta sa ilang mga arawan, kay nakasabot sila nga wala gyo'y kita ang katawhan. Pero ang mga silingan nga nagpa-utang usahay di gyod mosabot, pero sige lamang kuno, kay maningil man suma pa og balik ang panahon.
Naa gyod ang simpatiya sa matag usa, mabati gayod sa tanan, ug unta ang tanan na gayod ang mohatag og pailob ug higayon nga dili una moipit sa mga obligasyon ning panahon sa krisis.
Ang usa ka maayong butang ning panahona, ang magkahiusa sa pagbatok sa Covid-19 pinaagi sa pagtuman sa mga advisory gikan sa lokal nga kagamhanan. Motuman, di magginahi og ulo, kay kaayohan kini sa tanan.