KATUNGA na sa panahon ang "lockdown" o "community quarantine" tungod sa Covid-19. Duha na lang ka semana ug posibleng mobalik na usab ang naandang kinabuhi sa katawhan dinhi sa Davao.
Mahinumdoman nga gi-imposar ang 30 ka adlaw nga kurintinas aron mapugngan ang pagkuyanap sa bag-ong virus na nikalas na'g daghang kinabuhi sa kalibutan. Sa gihatag nga update gikan sa akong mga kuya sa Agila niadtong Marso 28 nga niabot na og 1,075 nga kaso dinhi sa Pilipinas.
Adunay 68 ka nangamatay samtang 35 ka pasyente ang naayo. Niadong Marso 29, gibalita nga napun-an og sobra 400 ang ihap sa positibo sa Covid-19 sa nasud. Kini daw ang pinakataas nga ihap nga ilang natala sa usa lang ka adlaw busa dili ibaliwala ang atong pag-amping.
Sa kalibutan, nag-una gihapon ang United States of America nga may 101,657 nga kaso ug 1,581 ang namatay. Gisundan kini sa Italy nga may 86,948 nga kaso og 9,134 nga namatay. Ingon pa sa akong higalang pari nga si Fr. Pix nga nag-kurintinas sa Roma nga sobra 60 na ka pari ang nangamatay human gitakbuyan og Covid-19.
Gimando ni Pope Francis sa iyang mga kapari-an ug kamadrihan nga motabang sa mga masakiton sama nga nagtabang si Jesus sa masakiton sa Judea sa iyang panahon. Ikatulo ang China diin gituohang didto naggikan ang bag-ong "strain" sa coronavirus nga may 86,948 nga natakdan samtang 3,299 ang namatay.
Sa akong kabahin, anaa pa kita sa kumingking sa problema tungod kay karon ra nangabot ang mga "testing kits" nga gamiton aron mahibal-an ang positibo sa virus. Ang kadtong positibo apan walay makitang sintomas karon posibleng magsakit sunod semana o kaha kung mapa-ilawon sa testing sa Department of Health.
Dinhi sa Davao Region mokabat na'g sobra 20 ang positibo nga anaa karon sa Southern Philippines Medical Center samtang nagkadaghan sab ang mga tawo nga gi-monitor ug gi-imbistigahan. Tungod niini, nimando si Davao City Mayor Sara Duterte-Carpio nga hingusgan ang pag-implimentar sa "lockdown" ug sa "curfew" gikan sa alas 9:00 sa gabii hangtod sa alas 5:00 sa buntag.
Puntiryahon daw sa Mayor ang Toril, Calinan, Buhangin, ug mga lugar nga luag kaayo ang implementasyon. Ipadayon sab ang "social or physical distancing" samtang ipahamtang ang "total mask covering" sa tanan nga mogawas sa ilang pinuy-anan.
Busa ang bag-ong motto nato ug sa mga Boy Scouts karon kay "Laging Malayo." Adunay plano nga pang-reskyuhon ang mga bata nga 17-anyos paubos nga naglatagaw ug pamultahon ang ilang mga ginikanan og P2,000. Pwera ang pasaway ug ang paghimo'g "fake news" nga makapataranta sa tawo.
Walay pagkulang sa pagkaon sa atong palengke ug malls busa dili mahadlok mahutdan gawas kung way sapi. Mali sab sa mga opisyal sa gobyerno nga maghimo'g kaugalingong balaod o sugo nga makapasamot sa kahadlok sa tawo sama sa "memo" nga gimando sa gubernador sa probinsiya sa Davao del Norte sa iyang mga mayor nga dili mobaligya og bugas ug ubang produktong agrikultura sa gawas sa probinsya.
Nasobrahan ra ang gubernador sa pagmahal sa iyang tinubuang probinsya. Pamahin sab sa uban gov!