COTABATO CITY -- Nagsubo karon ang mga molupyo sa Barangay Dinganen Buldon, Maguindanao sa kamatayon sa ilang silingan sa nahagsa nga air ambulance alas 8:00 sa gabii, Marso 29, didto sa Ninoy Aquino International Airport.
Ang biktima mao si Jael Edmark Agravante, 23 anyos, ulitawo nga usa ka Flight Mechanic sa Lionair West Wind Air Ambulance.
Murag dili makatuo ang pamilya, mga silingan ug kababayan ni Agravante sa kamatayon niini.
Usa ka mag-uuma ang amahan ni Agravante ug magtutudlo ang iyang inahan.
Kahinumduman nga pa-take-off ang West Wind 24 (RP-C5880) aircraft sa runway 24 sa Ninoy Aquino International Airport sa diha nga kalit midilaab, nahagsa ug dayon mibuto ang eroplano.
Paingon unta ang eroplano sa Haneda, Japan alang sa medical evacuation mission.
Apil sab sa mga napatay nga sakay sa eroplano mao sila Captain Ren Edward Nevado Ungson, Captain Melvin Bruel De Castro, Captain Mario Rosello Medina Jr., Dr. Nicandro Cenover Bautista II, nurse Conrado Tomelden Jr., Canadian passenger John Richard Hurst, ug American passenger Marilyn Vergara De Jesus.
Una ang pagkahagsa sa eroplano naka-text pa si Agravante sa iyang pamilya nga paingon sila sa Japan sa ihatud nga pasyente.
Nangandam na ang pamilya sa biktima sa pag-abot sa patay nga lawas niini nga ihaya sa ilang balay. (Edgar Fuerzas)