DAVAO DE ORO -- Lima ka mga tawo ang gi-warningan ning probinsiya gumikan sa pagpakatag og "fake news" nga mga balita nga nakadugang sa kabalaka ug nakapasamot sa kalisang sa katawhan.
Matud pa nga ang lima gi-istorya ug gi-warningan na sa lokal nga panggamhanan ug sa kapulisan gumikan sa pag-post sa social media og sayop nga impormasyon bahin sa Covid-19.
Gikabutyag nga usa ka dalagita nga nag-edad og 13 anyos ang usa sa duha ka mga naaresto sa lungsod sa Compostela niadtong Marso 19 gumikan sa pagpakatag og fake news bahin sa virus.
Ang municipal information officer sa lungsod nga si Julius Conejos nagbutyag nga ang maong 13 anyos nga dalagita kauban sa iyang ginikanan gi-istorya ug gitambagan sa opisina sa Municipal Social Welfare and Development samtang ang laing netizen gidala sa Incident Management Team Command Post ug gipahimangnoan sa iyang gihimo.
Marso 23, 202 usa ka babaye ang mitahan sa kaugalingon sa opisina sa Municipal Mayor sa Lungsod sa Nabunturan human nga siya nakamugna'g kalisang sa katawhan gumikan sa gi-post nga fake news sa social media.
Nga suma sa post niini, usa kuno ka doktor sa lungsod sa Montevista ang mikumperma nga aduna'y tulo ka mga tawo nga nag-positibo sa Covid-19 ning probinsiya ug ang maong tulo ka mga tawo gidala na ngadto sa ospital sa siyudad sa Davao.
Gibutyag ni Reciejane Lambo, ang information officer sa lungsod sa Nabunturan, nga gi-warningan sa lokal nga panggamhanan sa lungsod ang maong babaye ug gisultian nga di magpataka og post sa Facebook sanglit sa sunod posible na kining makasuhan.
Sumala pa nga human sa hitabo, gi-deactivate sa babaye ang iyang Facebook account. Sa samang adlaw, sa lungsod sa New Bataan nadugangan ang kabalaka sa katawhan human nga nag-post ang usa ka netizen nga aduna kuno'y sundalo nga nagpahibalo nga ang palengke sa lungsod, sirad-an.
Ang maong netizen, sumala pa ni Mirasol Mulato, ang information officer sa Lungsod sa New Bataan nangayo'g pasaylo gumikan sa maong fake news nga iyang gi-post sa Facebook.
Marso 27, 2020, naaresto sa kapulisan sa Nabunturan ang usa ka netizen nga nagpakatag og fake news sa Facebook nga sumala pa niya adunay nagpositibo sa Covid-19 sa Barangay Mainit sa maong lungsod.
Gi-istorya ug gi-warningan sa Nabunturan Covid-19 Information Command Center ug sa mga pulis ang maong mga netizens nga perti nakapangayo og pasaylo ug misaad nga di na mousab sa ilang gihimo. (Dexter T. Visitacion)