WALA na natuman ang social distancing sud sa prisohan sa Talomo Police Station kay sinardinas ang pagguot sa mga piniriso human nadugang ang 16 ka mga tawo nga nasikop sa kapulisan kay misupak sa curfew ug liquor ban.
Nasikop ang 16 ka mga tawo sa area of responsibility (AOR) sa Talomo police Dominggo sa gabii subay sa gipahugtan nga seguridad sa kapulisan sa pagpatuman sa community quarantine nunot sa pagkuyanap sa Covid-19.
Nagtindog na lang ang kaubanan sa 16 ka mga dinakpan gumikan dili na sila kalingkod tungod sa kadaghan sa mga piniriso.
Gihikay na sa General Investigation Section (GIS) sa Talomo PNP ang pagpasaka og kaso batok sa mga dinakpan.
Nagpahimangno ang Davao City Police Office (DCPO) sa katawhang Dabawenyo nga motamod sa mga regulasyon nga gipatuman sa awtoridad agi'g kabahin sa mga pamaagi aron malikayan ang pagkuyanap sa Covid-19 sa dakbayan.
Una nang gibutyag sa pamunoan sa DCPO nga di sila magpanuko nga modakop sa mga tawo nga malapason sa pagpatuman sa mga advisory sa Covid-19.