DISKARTE ang puhunan ni Angeles Nacario, 57, taga Barangay Casuntingan, Mandaue City karong panahon sa krisis ug papaubos sa dakbayan sa enhanced community quarantine (ECQ).
Imbis pasahero ang sakay sa iyang tricycle, karon mga kinumpra o di kaha mga gallon sa tubig na ang karga niini.
Sigon ni Nacario nga on-call lang sya sa iyang mga kustomer sauna nga mupakyaa og pahatod.
Kung adunay mukontak niya nga magpakuha sa mga supermarket o grocery store iya kining adtuon aron kuhaon ang mga kinumpra og ihatod sa balay sa iyang mga kustomer.
Kung dili mga kinumpra, manghatod sab siya og mga gallon nga purified water ngadto sa iyang mga kustomer.
Sama sa grab delivery, tawagan lang sya sa iyang mga suki nga adunay ipakuha og pahatod ug suhulan lang siya og P100 hangtod P300 depende sa ihatag sa iyang mga suki.
Kada human niya og pagpanghatod, ipangumpra sab niya ang iyang suhol alang sa iyang pamilya. (KFD)