SA MATAG adlaw nako nga programa sa Aksyon Radyo, nagkalain-laing reklamo ang akong nadawat gikan sa among mga suki nga tigpaminaw labot sa gipatuman nga community quarantine tungod sa Covid-19.
Hinuon, ilang mga reklamo ako nang gipadangat sa mga hintungdan nga ahensya sa gobyerno.
Di ko nalang usa-usahon ang ilang mga reklamo tungod kay di kini ang panahon sa pagsaway sa kakulangan sa administrasyon.
Sa kinatibuk-an, saludo ako sa mga frontliners ug mga opisyales sa gobyerno nga nagpasakit sa ilang kaugalingon.
Kung naglisud kitang mga Filipino, naglisud usab ang katawhan sa tanang nasud sa kalibutan nga apektado sa Covid-19 nga gikan sa Wuhan City, China.
Apan di usab karon ang panahon nga atong batikuson ang tinubdan sa makamatay nga kagaw.
Tumong sa atong lindog karon ang panghinaut ug pag-ampo sa Diyos nga makalingkawas kita sa katalagman karong panahona.
Ako nanghinaut nga pinaagi niining katalagman mahigmata ang kitang katawhan sa atong kaakuhan sa panglawas sa pamilya ug sa atong mga silingan.
Mahigmata kita nga angay gayud mangandam sa kanunay aron di kita mamatay sa gutom panahon sa katalagman.
Usab, mahigmata kita nga sa mga krisis sama sa atong nasinati karon, kinahanglan nga motuman kita sa mandu sa gobyerno.
Ug labaw sa tanan, mahigmata ang mga elected officials nga himuong prayoridad ang mga programa sa panglawas, pagtukod og dugang pasilidad alang sa mga masakiton, magdasig sa mga health workers nga magpabilin sa nasud nga moalagad sa mga local health centers, ug pakusgon ang mga ahensya sa gobyerno.
Sa nahitabo karon, di unta prayoridad nila ang minilyon o binilyon nga peace and order ug intelligence fund nga ang nahimulos mao lamang ang maayor ug iyang mga kaalyadong opisyal.
Human niining tanan, hinaut nga tun-an pag-ayo sa mga magbabalaud ang giduso ni anhing Senadora Miriam Defensor-Santiago nga Pandemic and All-Hazards Preparedness Act nga giduso niadtong 2013.
Kay kung giatiman pa kini nga balaod kaniadto, labing seguro nga di magkadipu-dipo ang gobyerno.