HIGALA sila kung matawag, dili sila kaaway sa katawhan, inay sila ang nagprotekta sa katawhan aron anaa kini sa luwas sa tanang higayon.
Kini ang pamahayag ni Davao City Police Office (DCPO) Director Police Colonel Kirby John Kraft dihang mokabat na sa 80 ka menor de edad ang ilang na-rescue ug 167 ka mga hamtong ang ilang nasikop kinsa misupak sa balaud sa curfew.
"All we are asking from the public is simply their cooperation. Hindi po kami kaaway. We are all doing this to protect you," ingon ni Police Colonel Kraft.
Sulod sa onse ka adlaw gikan sa pagdeklara ni Davao City Mayor Sara Duterte-Carpio nga ipailawom ang siyudad sa Davao sa community quarantine ug partial lockdown, gilayong nabutangan og ngipon ang curfew gikan alas 9 sa gabii padung alas 5 sa buntag.
Lakip sa gipatuman ang pagpaubos sa oras sa liquor ban nga inay alas 12 sa tungang gabii, naa na kini sa alas 5 sa hapon padung alas 5 sa buntag. Apan, dunay gahi og mga ulo, 79 niini ang nasikop kinsa gipang-isyuhan og citation tickets.
"We are mandated to take the necessary actions according to the prevailing laws and regulations set by the law. We have utilized maximum personnel to be out in the field to make sure everybody obeys the policy," dugang sa city director.
Naa baya tawon multa ug mapriso ang mga nakalapas niini nga balaud, mas maayong maglikay aron dili mabutang sa ingon niini nga sitwasyon.
Kaayohan kini sa katawhan ang gihimo sa kapulisan, husto si Kraft nga dili sila kaaway sa katawhan, nagprotektar lamang sila sa kaayohan sa publiko.
Luyo niining mikuyanap nga coronavirus disease (Covid-19) angay gayod nga suportahan sa katawhan ang kapulisan ug sa mga gipatuman ug mandu sa gobyerno, aron dungan nga makab-ot ang dakong kalamposan sa mosunod nga mga adlaw, hinaut pa unta.