COTABATO CITY -- Nagkantidad og P155 milyon ang gigahin nga pondo sa Bangsamoro Autonomous Region in Muslim Mindanao (Barmm) Office of the Chief Minister sa tanan nga mga local government unit (LGU) sa rehiyon.
Tumong niini nga mapakusog pa ang programa sa pakigbatok sa coronavirus disease (Covid-19).
Ang mga probinsiya sa Tawi-Tawi, Sulu, Basilan, Lanao del Sur ug Maguindanao ang modawat og tag P5 milyon, samtang tag P2 milyon ang dawaton sa mga siyudad sa Cotabato ug Lamitan City, Basilan.
Mga P8 milyon sab ang madawat sa 63 ka mga barangay sa probinsya sa Cotabato nga sakop na karon sa Barmm.
Modawat sab tag P1 milyon ang 116 ka lungsod o munisipyo sa lima ka probinsya sa rehiyon.
Giklaro ni MILG Minister Attorney Naguib Sinarimbo nga walay ika-balaka ang 116 munisipyo sa Barmm gumikan i-download dayon kini sa panudlanan sa matag local government unit o LGU.
Nagpasidaan si Barmm Chief Minister Ajod “Murad” Ebrahim sa mga opisyal sa LGU nga gamiton og tarong ang pondo alang sa kampanya batok Covid-19 apan kung mapamatud-an nga ila kining gibulsa manubag sila sa balaod. (Edgar Fuerzas)