SUPERBALITA DAVAO

3 nag-overprice sa alcohol, nangapriso

DAVAO. Makita sa hulagway ang kinarton nga isopropyl alcohol nga nakumpiska gikan sa tulo ka mga dinakpan. (Hulagway sa CIDG-RFU-Davao)

HUMAN sa bahad sa Criminal Investigation and Detection Group (CIDG) Regional Field Unit (RFU) sa Davao ngadto sa mga tawo nga mo-overprice sa mga isopropyl alcohol, tulo ka mga malapason ang ilang nasikpaw.

Pinaagi sa usa ka buy-bust operation sa tabang sa Regional Anti-Cybercrime Unit, nasikop ang tulo ka dinakpan alas 5:45 sa hapon niadtong Lunes didto sa Magallanes Street, Davao City.

Ang mga dinakpan nailhang sila Armalyn Asabdan, 27 anyos, online seller, nagpuyo sa No. 19, Barangay 31-D, Boulevard, Davao City; Marlon B. Noval, 42 anyos, minyo, drayber; ug si Alicia B. Noval, 66 anyos pulos nagpuyo sa No. 26 Tangigue Street, Barangay Lapu-Lapu, Agdao, siyudad sa Davao.

Nasayran nga nakig-transaksyon ang online seller ngadto sa nagtakuban nga pulis kinsa mopalit og lima ka karton nga dunay tag 50 ml isopropyl alcohol.

Sa dihang anaa na sa lugar ang mga dinakpan, gidunol sa pulis ang marked money nga bayad ug gilayong gigunitan ug giposasan ang mga suspetsado.

Nakumpiska sa ilang posisyon ang lima ka karton nga tag 50 ml nga isopropyl alcohol nga moihap sa 1,032 plastik nga butanganan nga walay label nga mokantidad og mokabat kapin kun kulang P30 mil.

Niadtong Biyernes, sikop sab ang tag-iya sa usa ka parmasya diin mokabat sa P53,860 nga kantidad sa isopropyl alcohol nga anaa sa overprice niya nga pagbaligya. Ang suspek nasikop sab pinaagi sa buy-bust operation sa Sta. Ana Police Station ug sa CIDG-RFU-Davao.

Una niini, nagbahad ang CIDG-RFU-Davao sa panguna ni Police Major Milgrace Cajes Driz nga wala silay palabyon nga mga malapason sa balaud kinsa nagpahimulos sa presyo sa mga nag-unang panginahanglanon sa pagbatok sa Covid-19.

Ning kasamtangan, gipangbalhog na ang mga dinakpan sa prisohan diin giandam na ang kaso nga ipasaka kanila didto sa korte. (Jeepy P. Compio)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph