MATANAO, Davao del Sur -- Gisikop sa mga personahe sa kapolisan ning lugar ang usa ka amahan human gimaltrato niini ang iyang 6 anyos nga anak didto sa Barangay La Suerte adlaw’ng Lunes, Marso 30.
Sumala ni Captain Rhuel Barachina, hepe sa kapolisan, nga nasikop nila ang suspek nga mao si Romel Embalsado Cortes, 49 anyos, mag-uuma nga molupyo sa Purok Orchids, human nag-viral sa social media ang hulagway sa bata nga gi-post sa usa ka concerned citizen ug nakita nga aduna’y samad ang ngabil ug dila sa biktima.
Gilayong milihok ang mga sakop sa Women and Children Protection Desk (WCPD) sa lugar aron dakpon ang suspek.
Nasayran nga gipasoan og baga sa amahan ang baba sa anak hinungdan nga nag-antus sa tumang kasakit ang bata.
Gipailawom na sa kustodiya sa WCPD ang biktima, samtang ang amahan niini mag-atubang sa kasong paglapas sa Republic Act 7610, o nailhang Special Protection of Children Against Abuse, Exploitation and Discrimination Act human nagtingkagol na sa ilang selda.
Sa social media, miani og kapungot sa mga netizens sa gihimo sa suspek ug nipadayag nga angayan lamang nga mabilanggo ang suspetsado.
Di pa masulti sa kapolisan kun unsa’y motibo sa krimen apan aduna’y hungihong nga na-aburido ang utok sa amahan human gipailawom ang lugar sa community quarantine. (Orlando B. Dinoy)