GIHINGUSGAN sa lokal nga kagamhanan sa Santo Tomas sa Davao del Norte ang usa ka pagpahamtang og silot sa tanang mga malapason sa gipatuman nga curfew sa munisipalidad sa usa ka pinasahi nga pamaagi.
Giingon nga pagasilotan pinaagi sa pagpasud-ong sa duha ka mga lungon nga walay sulod nga gibutang sa sud sa Santo Tomas Recreation and Cultural Center sa Feeder Road 3, Santo Tomas, Davao del Norte.
Si Mart Sambalod, ang tigpamaba sa munisipyo sa Santo Tomas, nagbutyag nga ang silot nga "watch-the-coffin" sa mga malapason sa curfew nagsugod niadtong Marso 19, ingon usa ka hugot nga pahinumdom sa kamatayon.
Dugang ni Sambalod, makita sa pipila nga mura'g magkatawa apan ang lokal nga kagamhanan sa Santo Tomas seryuso nga mihimo niini agi'g lakang sa pagpakusog sa kampanya sa pagbatok sa Covid-19.
Ang pagpasud-ong sa mga nadakpan ngadto sa lungon nga daw naay gihaya nga patay, mokabat kini sa walo ka oras, gikan alas 9 sa gabii padung alas 5 sa buntag.
Sumala ni Sambalod nga anaa na sa 340 ka mga tawo ang nadakpan sa curfew sugod niadtong Marso 19 hangtud gabii sa Marso 30 diin ang tanan pulos mga hamtong ug walay mga menor de edad.
Giingon sa opisyal nga human nila maglamay sa lungon, mohimo pa sila og usa ka community service ug kasohan pa gyod sila didto sa korte, butang nga pipila sa mga residente sa munisipalidad sa Santo Tomas, ang nag-igmat na karon ug di na mogawas sa dis-oras sa kagabhion.
Tungod sa maong estratihiya, ang mga residente sa maong munisipyo nag-amping sama nalang sa paghimo sa mga angay nga buhaton sa pagbatok sa makamatay nga virus. (PIA-Davao Region)