GI-KWESTIYON ni Konsehal Jocelyn "Bebot" Rodriguez kung asa na ang pundo sa dakbayan sa Cagayan de Oro kini human nga naaprobahan ang laing gipangayong pundo sa buhatan sa Mayor niadtong sesyon, Marso 30.
Gibutyag ni Rodriguez atol sa regular sesyon kinsa supak sa pagpalabang sa giduso nga dugang pundo nga anaa sa kapin P600 milyones nga kinahanglan nga ma-klaro una kung asa ang calamity fund ug ubang pundo nganong kinahanglan nga magdugang na usab og dakong kantidad.
"Ang calamity fund asa man? otherwise asa sab ang emergency welfare crisis? Di na lang nako hisgutan ang Intelligence fund nganong molagpot man ta sa supplemental budget nga wala paman gani nato naklaro atong calamity fund," matud ni Rodriguez.
Gidugang pa niini nga wala pa nakatunga sa gasto ang siyudad diha sa panginahanglanon alang sa pakigbatok sa coronavirus disease (Covid-19) ug nangutana usab kini kung asa na ang calamity fund ug asa kini gigasto.
Samtang sa tubag usab ni Konsehal Ian Mark Nacaya, nibutyag kini susama nga dili gusto ni Rodriguez nga hatagan og suporta ang katawhan.
"Sa pangutana nga aha man ang pundo, well di siguro maayo kana pwedi konsehal siya adto siya sa budget office didto siya mangutana kay akong nahibaw-an katong mga nasunogan gipanghatagan man tog financial assistance," matud ni Nacaya.
Samtang giklaro usab ni Atty. Percy Salazar sa budget office nga tanan nga aksiyon ug kalihokan kalabot na sa Covid-19 nagkinahanglan gyud og pundo.
Anaa sa P90 milyones ang quick respond calamity fund. Giingong nakapagula na og pundo nga barangay assistance fund gikan sa 2020 budget sa mga kabaranggayan alang usab sa ilang panginahanglanon sama sa mga pagkaon, ug uban pa nga anaa sa P8,880,000 sa tibuok dakbayan.
Samtang ang kapin P600 milyones nga gi-aprobahan sa city council nga supplemental budget.
Giingong ang P550 milyones niini ang alang sa covid response diin ang P500 milyones ang standby fund alang sa mga mga katawhan labi na kung simbako magkagrabe pa ang sitwasiyon samtang ang P50 milyones ang alang sa imprastuktora alang sa mga posibleng pagahimuon nga isolation centers.
"Kani among gi-prepare nga P500 million standby funds kini just in case nga dili gyud kaya nga mahatagan tanan sektor," dugang pa.
Gidugang pa ni Salazar nga kini nga mga pundo naa pa sa dakbayan.
"Ako lang gustong klaruhon nga wala kita nag usik-usik sa atong mga kwarta sa panggamhanan, ato kining gilantaw daan ug ato kining ginapaigo-igo," matud ni Salazar.
Giklaro usab ni Salazar nga ang 70 porsyento nga calamity fund nga P300 milyones duna pa kini nahabiling mga P250 milyones apan giklaro niini nga duna na kini mga gigahinan nga mga gamitan niini sa tibuok tuig.
Giingong ang calamity fund mao usab ang gigamit sa mga mangayo og tabang sa dakbayan sama na lang sa financial assistance, medical assistance sama sa bayrunon sa ospital o dugo, burial assistance (pagpalubong, lungon, ug pag-embalsamar), balik-probinsiya o tabang sa plitehan sa mangayo og tabang nga makapauli lakip na food assistance o cash assistance sa nagbantay sa pasyente nga gi-abandona ug uban pa.
Ang P90 milyones ang kasamtangang gigamit diin anaa sa P28 milyones ang naggasto alang sa quick response fund.
Samtang giklaro usab nga ang intelligence fund ang alang man usab kini sa anti- terroristic nga kalihokan.