DEAD on arrival sa ospital kining usa ka lalaki dihang ang motorsiklo niini mibangga sa likod sa dropside truck Dominggo sa gabii sa Sayre highway, P-3, Bayabason, Maramag, Bukidnon.
Giila ang biktima nga mao si Dionieson N. Delos Santos, 27, minyo, taga P-9, Dologon, Maramag, Bukidnon.
Ang truck driver mao si Rellie Tyrone Redondo Inguito, 25, taga P-2, Kawilihan, Don Carlos, Bukidnon.
Sa imbestigasyon sa Maramag police sa pagpanguna ni Police Lieutenant Colonel Casan Ali, nasutang susama ang direksyon sa truck ug motorsiklo dihang pagsubida nabangga ang motorsiklo sa likod nga portion sa trak hinungdan sa kadaot nga naangkon sa driver sa motorsiklo.
Gisuwayan pa og dala ang driver sa motorsiklo sa Bukidnon Provincial Hospital apan dead on arrival kining gideklarar sa mga doktor.
Ang driver sa truck detinado sa police station karon panahona.