GI-APROBAHAN sa 19th City Council ang kapin sa P600 milyones nga dugang pundo aron nga maoy magamit sa lokal nga kagamhanan sa siyudad sa Cagayan de Oro sa pakigbatok sa coronavirus disease (Covid-19).
Kini base na usab sa joint memorandum circular 1 sama sa Department of Social Welfare and Development (CSWD), Department of Labor and Employment (Dole), Department of Trade and Industry (DTI), Department of Agriculture (DA), Department of Finance, Department of Budget and Management (DBM), ug Department of the Interior and Local Government (DILG) alang sa mga apektado nga residente labi na sa lugar nga gipaubos sa enhanced community quarantine.
Anaa sa total nga P658,448,687 ang pundo nga dugang alokasiyon o aron nga mapangandaman kung simbako nga magkagrabe kining kahimtang sa virus sa dakbayan.
Gibutyag ni Vice Mayor Rainier Joaquin "Kikang" Uy nga na-aprobahan na ang maong cash assistance sa matag rehiyon ug sa Northern Mindanao anaa sa P6,000 ang matunol apan base na usab sa giya sa maong memorandum.
"We approved it already... Dili siya per household kay naa na'y guidelines ato sa national circular number 1," dugang pa.
Giklaro usab ni Uy nga kinahanglan nga duna kini liquidation isip public funds.
"Dili mahimo'g wala'y liquidation na gyud na tanan when it comes to public funds everything is liquidated," dugang pa.
Samtang gibutyag usab ni Konsehal Ian Mark Nacaya, majority floor leader nga gipasabot kini sa budget officer kung nganong kinahanglanon ang maong dugang pundo base na usab sa Joint Memorandum Circular (JMC) 1 series of 2020.
"Nag-justify ngano kinahanglan ang P500 million ug gihatag niya ang guideline nga JMC 1 2020 sa mga government agencies," matud ni Nacaya.
Nasayran nga uyon ang kadaghanang konsehal niini gawas lang sa nisupak nga si Konsehal Jocelyn "Bebot" Rodriguez samtang abstain si Konsehal Lordan Suan.