APROBADO na sa City Council ang ordinansa nga gipalabang labi na ang pagsilot pinaagi sa pag-community service sa mga masapon nga naglatagaw sa bisan asa nga dapit sa dakbayan labi na nga kasamtangang anaa sa community quarantine ang siyudad sa Cagayan de Oro.
Ang masapon sa unang higayon mag-community service og duha ka oras, ikaduhang higayon nga makalapas kinahanglan nga mag-community service og upat ka mga oras, ug ang masapon sa ikatulong higayon mag-community service sa tibuok adlaw o walo ka mga oras.
Samtang ang mga menor de edad dalhon sa Barangay Council for the Protection of Children (BCPC) kauban ang ginikanan aron nga mapahimangnoan ug ma-edukar o seminar sa pila ka oras ug ipasaad nga bantayan na ang mga anak.
Giduso ni Konsehal Teudolfo Bong Lao ang shelter in place ordinance kini aron nga mapatuman gyud ang tumong nga magpuyo sa balay aron nga malikay sa coronavirus disease (Covid-19).
Gibutyag ni Lao nga ang bisan kinsa nga masapon nga wala'y mga tuyo nga importante lakip niini.
"During the whole day even at night if they are loitering anytime they can be apprehended as long as they have no important things to do," matud ni Lao.