Curfew, ECQ gisupak, dakpan

BISAN sa hugot nga pagpatuman sa curfew ug enhanced community quarantine (ECQ), dunay gihapoy mga tawo nga way kahadlok, gihagit ang mga awtoridad, nanggawas sa mga balay.

Sa Dakbayan sa Lapu-Lapu, dunay 400 nga nadakpan tungod sa paglapaw sa curfew ug ECQ. Niadto usang Dominggo sa gabii, dunay 50 ka mga tawo nga ningsuway sa pagsakay og barkong pasaheroan gikan sa Dakbayan sa Sugbo padung sa Ormoc City.

Apan nakahukom si Ormoc City Mayor Richard Gomez nga di sila dawaton hinungdan nga nakalawig ang barko nga puro ra mga kargamento ang dala samtang gipang-ulian sila sa ilang mga ticket. (50 ka taga Ormoc wa pasakya sa barko)

Bisan sa hugot nga seguridad karon nga gipatuman, duna gihapoy namaligya og illegal drugs nga nasikop sa buy-bust operation. (P.5 M shabu nasakmit, tulo sikop sa buy bust)

400 Nadakpan

Sukad sa hugtanong pagpatuman sa curfew ordinance ug ECQ sa Dakbayan sa Lapu-Lapu hangtod sa Marso 31, adunay dul-an 400 ka mga tawo nasikop.

Samtang ang upat ka "quarantine control points" sa dakbayan ang 24 oras nga gibantayan sa kapulisan ug force multipliers.

Ang curfew ordinance gisugdan og patuman niadtong Marso 13 samtang sa kadlawon sa Marso 29 gipatuman ang ECQ.

Niadtong Marso 27 niepekto ang social distancing sa mga publikong sakyanan ug motorsiklo.

Matod pa ni Police Col. Clarito Baja, hepe sa city police office, nga sa 381 ka mga nangadakpan sa curfew, 92 niini mga menor de edad nga gi-turn over ngadto sa barangay diin sila masakop aron nga maoy mo-turn over ngadto sa ilang mga ginikanan.

Gipasusi sab sa opisyal ang talaan sa data base sa matag barangay aron pagsuta kon ikapila na ka higayon sila menor nadakpan sa maong kalapasan, kay adunay gitakdang penalty sa kadtong nagbalik balik na og himo sa maong salaod.

Apan sa mga hamtong nga nadakpan ilabi na niadtong way "home quarantine pass", sagad nila ang mibayad sa multa aron di na bilangguon.

"Ang penalty (curfew/ECQ) naay P1,000, sa first offense, P3,000 ug P5,000 sa second ug third (offense)," pahibawo ni Baja.

Katarungan sa mga nangasikop giingong wa mahibawo sa ordinansa taliwala sa subsob nga information dissemination sa barangay ug pulis pinaagi sa mainstream media, social media posting ug rekorida sa nagkadaiyang suok sa barangay.

Sa susamang kalambuan, adunay kinatibuk-an 302 ka mga multicab drayber ingon man drayber sa motorsiklo ang nakadawat og TCT sa dihang napatuyang og karga og pasahero ingon man niadtong adunay angkas sa motor.

Nagkanayon ang opisyal nga duha nasikop nangabilanggo sa kasong disobedience to person in authority sa dihang nagsukol-sukol sa pulis o traffic enforcer atol sa ilang operasyon.

Pulis

Sa laing bahin, 12 ka pulis sa matag shift ang nagbantay sud sa 24 oras diha sa quarantine control points sa Lapu-Lapu inabagan sa Bureau of Fire and Protection (BFP), Philippine Navy, traffic enforcers ug ubang force multipliers. Ang maong quarantine control points naglakip sa duha ka taytayan, ug duha ka lapsanan sa utlanan sa lungsod sa Cordova.

Mandaue

Duha ra ka mga tawo nadakpan sa curfew ug disobedience sa Dakbayan sa Mandaue sukad gipatuman na ang curfew.

Sigon ni Police Col. Jonathan Abella, city director sa Mandaue City Police Office, ang mga dinakpan nasikop atol sa pag-roving sa kapulisan sa matag barangay kauban ang mga barangay tanod. Nadakpan kini niadtong Marso 28, 2020 sa alas 11:45 sa udto. Gidakop sab kini tungod wa pagtuo dayon sa kapulisan human badlunga.

Sigon ni Abella nga dili na kaayo daghan ang maglakawlakaw sa dalan karong panahona ug nituman ang mga lumulupyo sa Mandaue sa ilang mga panghimangno kabahin sa 24-hour curfew sa dakbayan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph