ORMOC City, Leyte – Dakbayan sa Ormoc di modawat og bisan kinsang mga tawo nga gikan sa lugar nga dunay positibong kaso sa coronavirus disease (Covid-19).
Kini ang kamanduan ni Mayor Richard Gomez ug ubang opisyales sa dakbayan aron pabilin nga maprotektahan sa Covid-19. Matod sa Mayor nga ang mga taga Ormoc nga naa karon sa laing lugar dapat mosunod sa home quarantine process sa lugar.
Sa miaging Lunes, Marso 30, naukay ang dakbayan sa Ormoc kahuman gisabutan sa mga opisyal nga paulion ang 50 ka taga Ormoc nga naa karon sa Sugbo ug pasakyon sa usa ka special trip sa MV Theresian Stars sa Roble Shipping.
Nagsagol ang reaksyon sa mga taga Ormoc sa plano, apan nipatigbabaw ang pagsupak niini hinungdan nga gidungog sa mayor ang kadaghanan.
Wa mo uyon ang mga tawo gumikan kay daghan na ang nagpositibo sa Covid-19 sa Cebu ug dunay namatay.
Nagtapok na unta sa pantalan sa Cebu ang mga pasahero sa samang adlaw apan napakyas kini human nadawat ang report nga di modawat ang dakbayan kanila ug nagpa-refund nalang sa ticket. (JKDP, HBL)