USA ka lalaki ang gipusil patay sa wa mailhing mga suspek sulod mismo sa iyang balay didto sa Purok 1-A, Barangay Malativas, siyudad sa Panabo.

Giila ang biktima nga mao si Alfredo Albit, 59, ug molupyo sa maong purok.

Sa report gikan sa Panabo City Police Station nasayran nga pasado alas 6:00 sa gabii niadtong Dominggo didto sulod sa ilang balay ang biktima, dihang dunay nanuktok sa ilang pultahan nga mga lalaki.

Sa dihang giablihan sa biktima ang pultahan, gipusil dayon siya sa wa mailhing mga suspek gamit ang M-16 rifle sa makadaghang higayon.

Ang biktima nahiagum og mga samad pinusilan sa nagkadaiyang parte sa iyang kalawasan hinungdan sa iyang hinanali nga kamatayon.

Human sa pagpamusil ang mga suspek yano lamang nga misibat padulong sa wa matino nga lugar agi sa likod nga bahin sa balay sa biktima.

Nagtuo ang pamilya sa biktima nga posibling daang bikil ang motibo sa pagpamusil.

Ang biktima usa ka kanhi sakop ni Kapitan Varona sa may Barangay Malabog Paquibato District siyudad sa Davao nga gipatay sa mga gidudahang sakop sa rebelding New People's Army niadtong miaging tuig.

Kapulisan sa dakbayan sa Panabo mihimo na og dugang pakisusi sa nahisgutang pagpamusil. (Marvin Pineda)