MAS delikado ang puwersa sa San Miguel Beermen nga wala ang higanteng Sugboanon nga si June Mar Fajardo.
Mao kini ang obserbasyon ni Blackwater Elite coach Nash Racela human niya giistudyohan ang opening game sa Philippine Basketball Association (PBA) Philippine Cup tali sa Beermen ug Magnolia Ang Pambansang Manok Hotshots.
Ang kombati, diin mingdominar ang Beermen, 94-78, maoy bugtong napahigayon una gipahunong sa PBA ang mga duwa sa komperensya gumikan sa pagkuyanap sa coronavirus disease (Covid-19).
Sa interbyu sa Spin Sidelines episode, gipasabot ni Racela nga wala siya nasurpresa nga yanong gipangkastigo sa Beermen ang Hotshots sa labing una nilang duwa sukad nasinati ni Fajardo ang grabeng pakaangol sa iyang tuo nga tiil.
“I wasn’t really surprised,” pagtino ni Racela.
“Ang stand ko really was sa pagkawala ni June Mar, it gives the other players more opportunity to show kung anong meron sila especially a team like San Miguel na hindi nagkukulang sa talent. Kapag ganyan ang sitwasyon, mas lalong nakakatakot sila.”
Sa pagpadaplin ni Fajardo, lima ka mga sakop sa Beermen ang ningmugna og dobleng numero nga puntos nga gipangulohan ni Mo Tautuaa.
Si Tautuaa, kinsa tigrelibo lang ni Fajardo kaniadto, nagpakatap og 20 puntos aron pangulohan ang kabangis sa Beermen.
Ning higayuna, ang uban mga kasaligan sa Beermen sama nila ni Terrence Romeo ug Arwind Santos aduna nay kagawasan sa pagdiskarte basi sa ilang abilidad.
“Nung nandoon si June Mar, ang basa ko, most of the players, nagpipigil sila ng game because they wanted, in a way, to serve June Mar because siya ‘yung primary option sa opensa,” pasabot ni Racela.
“Now na wala siya, mas nakakatakot dahil limang tao sa loob, kaya mag-deliver which really what happened in that first game. From all angles, umatake ang San Miguel from Mo Tautuaa to the guards."
Sukwahi sa pagtuo sa uban, matod ni Racela nga ang Beermen lang gihapon ang labing inilog ning maong komperensya.
Ning komperensiyaha ang Beermen nagtinguha sa ilang ikaunom nga sunod sunod nga Philippine Cup title. (ESL)