NANGATANGGONG sa ALA Gym ang kanhi world title challengers nga sila si Melvin Jerusalem ug Jonas Sultan kay wala man kini nakauli sa ilang probinsya atol sa pagsirado sa borders gumikan sa coronavirus disease (Covid-19).
Hinuon gipahimuslan nila ni Jerusalem ug Sultan ang sitwasyon pinaagi sa pag-ensayo aron magpabilin silang kondisyon taliwala ning kahasol nga hatod sa Covid-19. Gawas nila ni Jerusalem ug Sultan, nga pulos taga Mindanao, aduna sab pipila ka amateur boxers ang nangtanggong sa ALA Gym.
Sa interbyu sa Sun.Star Cebu, gipasabot ni Jerusalem nga kinahanglang magpabilin ilang kondisyon aron andam sila kon aduna moabot nga oportunidad.
Si Jerulem, kinsa No. 1 ranked minimumweight sa World Boxing Council (WBC), mitataw nga naa ra sila sa maayong kahimtang. Apan wala niya gitago nga mingaw ang palibot sa ALA gym ning higayuna sukwahi sa naandan.
Nagbansaybansay sila si Jerusalem ug Sultan nga walay naggiya kanila nga trainers nga naubos sab sa community quarantine.
Aron pagwagtang sa kalaay, aduna mga higayon nga ang-post si Jerusalem sa social media og mga hulagway ug videos sa ilang pag-training.
Si Sultan aduna unta'y away niadtong Marso 21, 2020 batok kang Ricardo Malajika alang sa IBF Inter-Continental super flyweight title sa South Africa apan nakanselar tungod sa Covid-19. (EKA)