SUPERBALITA CEBU

Diputado: Ang mga sabungero sa Covid

Cuentas claras

HUSTO ang gisulti ni Agriculture Secretary William Dar. Daghan ang pagkaon karon bisan pa sa nasinati nga hulga sa Covid.

Ang problema kay makulangan ang baligya sa merkado tungod kay maglisod paglabang sa mga checkpoints ang mga cargo trucks nga nagdala sa mga pagkaon.

Lain-lain ang patakaran sa mga lungsod o siyudad nga malabyan sa mga cargo truck.

Mao kini hinungdan nga malata o madaot na lang ang pagkaon nga gikarga sa maong mga cargo truck og dili na moabot pa sa merkado.

Sama sa nakalimot ang ubang mga opisyales karon.

Ang ilang huna-huna, seryoso kaayo ang problema sa Covid og mao kana ang hinungdan nga ilang gihigpitan ang ilang pagbantay sa ilang tagsa-tagsa nga mga checkpoints.

Ug tungod niini, hasta ang pagpasulod sa mga cargo truck nga nagdala og pagkaon ila sab nga gihigpitan.

Husto kini.

Apan angay nga ilang masabtan ug hinumdoman nga importante kaayo ang pagkaon kay mao lang kini ang atong puhonan nga mahimsog ang atong panglawas, molig-on ang atong resistensiya ug makalikay kita nga takboyan sa sakit nga Covid.

Kon maluya ang atong lawas kay kulang o wala na kitay gikaon, mag-unsa pa man kanang ilang pagbantay sa checkpoint?

Daghan ang nahisagmuyo sa dihang ilang nahibaw-an nga maglisod na sila pagbyahe karon gikan sa Cebu paingon sa mga silingan nga mga probinsiya.

Dili sila gusto mosakay sa mga depasahero nga mga sakyanan tungod sa kahadlok sa Covid. Tungod niini, gusto nila nga mag-hire na lang apan dako man og gasto, gawas pa sa kalisod nga makalabang sa mga checkpoints sa kada lungsod nga malabyan.

Mao kining mga tawhana ang na-stranded tungod sa gipalapdan karon nga kwarantinas.

Naglisod na sila sa pagkaon kay wa nay namasahero, gamay na lang ang namaligya sa pagkaon og hilabihan kataas sa linya sa mga namalitay sa mga malls ug department groceries.

Mao kini ginaingon nga agwanta Delfin.

Dunay balita karong bag-o pa lang nga dihay usa ka grupo sa mga sabungero sa Bohol ang miadto sa Davao aron moapil sa derby.

Dakong problema kay daghan ang nasakit sa Covid sa maong lugar, gani ang “Kristo” namatay tungod sa maong sakit.

Mao kini hinungdan nga “markado” kining maong mga sabungero karon tungod sa posibilidad nga hasta sila naigo sab sa tare sa Covid.

Ang usa kanila, matod pa, naa karon sa ospital og padayon nga gigamitan sa ventilator aron lang makaginhawa.

Ang ilang mga pamilya “markado” sab tungod kay ulahi na man nahibaw-an sa mga sabungero nga perte ka kusog diay sa Covid sa maong sabungan unya nakauli na man sila sa ilang mga panimalay og tagna-tagna na lang karon kon kinsa ang dunay “contact” kanila, apil na ang ilang mga amigo ug kaila.

Sa gimantala sa mga TV stations karon pinaagi sa DOH, gipahibalo nga dili kinahanglan ang face masks sa mga way gibati sa ilang panglawas ug alang lang sa mga “front-liners” ang face masks.

Apan ang mga LGUs, dili tugotan ang mga tawo nga mosulod sa mga groceries o malls o mogawas sa ilang panimalay kon wa magsul-ob og face masks.

Usa kini sa mga hinungdan nga naglibog ang katawhan og wa na sila masayod og kinsay sundon niini.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph