LUOY kaayo ang mga frontliner sama sa mga doktor ug nurses nga nakiggubat batok sa Coronavirus disease 2019 (Covid-19).
Di lalim ang ilang pakiggubat kay di man makita ang ilang kontra. Maypa ang klarong gubat gamit ang armas kay makabawos pa.
Wa silay pag atras sa gubat pinaagi sa pag atiman sa mga pasyente nga ilang gitambalan bisan ug nahibawo sila nga naglatay sa usa ka lugas sa lanot ang ilang kinabuhi.
Kon mahurot sila, kinsa naman lang ang motambal kanato? Busa ang pagpuyo sud sa balay maoy atong buhaton.
Covid-19 Cebu
Sa siyudad sa Sugbo, aduna nay nangamatay nga mga doctor. Wa gyud makalingkawas human matakdi ug namatay gyud sila si Dr. Dennis Tudtud, Oncologist ug iyang asawa nga si Helen nga usa ka Pathologist.
Ingon ani kakuyaw ang Coronavirus nga miataki sa tibuok kalibotan nga gikan sa siyudad sa Wuhan sa nasud sa China.
Daghan na ang nahimong positibo sa siyudad sa Sugbo. Apan mas gamay ang sa probinsya. Ambot lang kon manggawas na ang tanang resulta, hinaot nga dili kalit nga mosaka.
1M Positive
Grabi! kay hapit na moabot sa usa ka milyon ka mga tawo ang nahimong positibo sa Coronavirus sa tibuok kalibutan samtang 37,820 ang namatay.
Nag-una sa gidaghanon sa mga positibo ang nasud sa Amerika nga adunay 164,253 ug 3,167 ang namatay.
Gisundan sa Italy 101,739 ka mga kaso ug 11,591 ang patay. Gisundan sa Spain nga dunay 87,956 ug 7,716 ang namatay.
Ang China 81,518 ka kaso ug dunay namatay mga 3,305. Apan daghan ang nagduda nga gitago sa Komunistang China ang tinuod nga nasakit ug namatay.
Dunay taho nga migawas nga moabot sa 50 mil ka mga tawo ang namatay ug minilyon ang nahimong positibo. (Email: efrenlonzon71@gmail.com / text sa 09235562777)