DILI maayong maghisgot og kaguliyang sa pulitika ning panahona nga gikinahanglan ang atong panaghiusa batok sa labing mangtas nga hulga sa atong panglawas karon, dili dinhi sa atong dapit, apan ang tibuok kalibotan natay-og niini, ang coronavirus disease 2019 (Covid-19).
Apan bisan ang yano nga molupyo dili makalikay sa pagkomentaryo sa pagpatuman sa higpit nga polisiya sa mga opisyal sa nagkalainlaing local government units (LGU) sa enhanced community quarantine (ECQ) nga unang nakamugna og kalibog sa katawhan tungod sa ilang walay klaro nga plano ug koordinasyon labi na sa nagsikit nga LGUs sa Metro Cebu.
Mao nga kon dunay bisan usa lang ka LGU nga molahi sa iyang pamaagi, momugna kini og dakong komplikasyon tali sa ubang LGUs. Ang katawhan kanunay biktima sa ilang patas-anay og utong o garbo. Sama sa unang editoryal ning mantalaan, ang koordinasyon importante labi na sa Metro Cebu nga dunay kadugtongan ang matag problema.
Sa kahimtang karon, ang lalawigan sa Sugbo maoy nigawas nga lahi sa iyang kapatas nga gahom sa tulo ka highly urbanized cities sa Sugbo, Mandaue ug Lapu-Lapu. Nakita nato nga si Gobernador Gwendolyn Garcia maisugon sa iyang pagpatuman sa mando ug personal nga nisusi sa implementasyon.
Ug sa sinugdanan pa lang pareho silang mga opisyal sa LGUs nga walay klaro, apan mas nipatigbabaw ang lalawigan ug dakbayan sa Sugbo o human nagsunodsunod sa ilang executive orders (EOs) nga nagpaklaro na sa walay klaro.
Samtang, nangalisbo ning sayo pa ang duwa sa pulitika nga naghinayghinay na sa pagpadulong laing kamada.
Hangyo nato sa mga lider sa atong mga lider nga igo na intawon. Ayaw pagpalabi sa inyong personal nga batasan. Pwede anha lang na sa inyong balay? Prino og dyutay. Pagpaubos usahay kay sa ingon nga paagi, ituboy ikaw sa ibabaw sa katawhan.