ADUNA’Y gitagana ang Cebu Ports Authority nga berthing areas alang sa mga sakyanang pangdagat nga gi-komisyon aron mo-biyahe sa medical supplies, equipment ug health workers aron mapadali ang paghatod niini sa nagkadaiyang parte sa lalawigan sa Sugbo.
Mao kini ang gipahibawo ni CPA General Manager Leonilo Miole. Si Miole namahayag nga wala sila'y gipahamtang nga dugang port charges sa mga cargoes susama sa cargo handling, pilotage, terminal, ug miscellaneous charges.
“CPA is fully supportive of the efforts to help combat COVID-19, in fact, aside from closely supervising our port operations, CPA is offering all the support we can provide in close coordination with partner national and local government agencies," matod ni Miole.
Dugang ni Miole nga karon nga nagsige pa sila og suta kon asa sa ilahang dapit sila makatukod og quarantine centers, medical relief, ug aid distribution locations o temporary medical facilities, nagtanyag na ang CPA sa ilahang Social Hall aron magamit nga temporaryo nga living quarters sa mga health workers sa Vicente Sotto Memorial Medical Center (VSMMC) nga nagpuyo sa layo o kaha kadtong wala na dawata sa ilahang landlords.
"We are doing this as our little way of helping our frontliners and our government in this fight against COVID-19,” si Miole nagkanayon.
Subay usab niining gipatuman nga Enhanced Community Quarantine sa probinsiya sa Sugbo, gipasalig sa CPA nga pabilin nga operational ang ilahang pantalan alang sa pagsulod sa mga goods, “Amid the threat posed by COVID-19 and the implementation of ECQ, CPA continues to provide support by manning our ports to ensure the unhampered movement of cargoes, basic and essential goods and other necessities."
Nanghangyo usab kini sa Cebu Provincial Government ug sa Cebu City Government nga dili did-an ang ilahang personnel sa pagsulod ug gawas sa ilahang mga empleyado sa mga borders ingon man dili kini lisod-lisuron. (HBL)