APROBADO na sa konseho sa dakbayan sa Lapu-Lapu ang resolusyon nga gipangamahanan ni Konsehal Rico Amores nga maghatag ug hazard pay alang sa mga frontliners sa pagbatok sa coronavirus disease COVID-19.
Nauyonan sa konseho ang P500 nga hazard pay matag adlaw ang ihatag sa kagamhanan sa dakbayan atol sa gipahigayong special session niadtong Marso 30 Lunes.
Matod ni Amores nga nagdepende ra hinuon ni Lapu-Lapu City Mayor Junard "Ahong" Chan kung sundon ba gayud niini ang P500 matag adlaw nga ihatag sa mga frontliners.
Retroactive usab kini gikan sa Marso 17, ang adlaw diin unang gipaubos sa General Community Quarantine ang dakbayan nga karon gisaka na ngadto sa Enhanced Community Quarantine.
Gawas niini gipahibawo ni Amores nga aprobado na usab sa konseho sa dakbayan ang moabot sa P261M nga gipangayo ni Chan isip supplemental budget nga maoy gamiton sa pagbatok sa COVID-19.
Si Chan una nang mibutyag nga ang maong kantidad maoy kuhaan sa kagamhanan sa ilang pagpang apod-apod ug usa ka sakong bugas sa matag panimalay sa dakbayan samtang anaa pa sa ECQ ang dakbayan.
Gipahibawo usab ni Amores nga samtang anaa pa sa ECQ ang dakbayan sa Lapu-Lapu hangtod sa Abril 14 hayan nadesisyonan usab sa konseho nga dili lang una sila mopahigayon og session.
Sa Abril 16 na sila mobalik ug pahigayon ug session sumala ni Amores.
Andam hinuon sila mopahigayon ug special session kun kinahanglanon samtang anaa sa ECQ ang dakbayan.
Gipahimangnoan ni Amores ang mga Oponganon sa pagpundo na lang sa ilang tagsa-tagsa ka mga panimalay samtang ECQ pa ang dakbayan sanglit aduna may hinabang gikan sa kagamhanan nga moabot ngadto kanila.
Gihan-ay pa hinuon matod pa ang guidelines sa pagpang apod-apod sa midyear cash assistance sa mga senior citizens sa dakbayan aron dili masupak ang padayong pagpatuman sa social distancing.
Nanghinaot si Amores nga mahulma na kini sa pinakadaling panahon sanglit mao usab kini ang giatngan sa mga senior citizens nga ilang magamit niining panahon sa ECQ.
"Kung moduty ang frontliner ug ka 5 sa usa ka semana sa usa ka buwan kakuha siya ug mga P12,000," matod ni Amores. (GCM)