ANG Cebu City Government mohatag og financial assistance ngadto sa 80 ka mga barangay sa dakbayan sa Sugbo gumikan sa padayong hulga ug epekto coronavirus disease (Covid-19.)
Si City Administrator Floro Casas Jr., nagkanayon nga magdepende sa gidaghanon sa mga residente ang hinabang, apan gahinan ang matag barangay og P1 million ngadto sa P3 million.
Ang distribution gikatakdang sugdan karong adlawa, Miyerkules, Abril 1, hangtod sa Biyernes subay sa mando ni Mayor Edgardo Labella.
Si Konsehal Raymond Garcia, majority floor leader sa City Council, nagkanayon nga ang maong kantidad gikuha sa general fund karong tuiga.
Base sa record, niabot og P130 milyones ang gipagawas nga pundo sa Dakbayan para sa 80 ka barangay.
Ang barangay Guadalupe, Lahug, Tisa, Basak San Nicolas, Labangon, Mambaling, Mabolo, Inayawan, Apas, Talamban maoy mga barangay nga nakadawat og tag P3 milyones gumikan sa kadako sa ilang population.
Samtang tag P2 milyones ang ihatag ngadto sa barangay nga adunay 6,000 ngadto sa 17,500 ka mga botante.
Makadawat usab og tag P1 milyon ang 40 ka mga barangay nga adunay voting population mga 6,000 paubos.
Ang 80 porsiyento sa maong kantidad magamit para sa pagpalit og pagkaon sa tagi barangay ug laing 20 posiyento para sa personal protective equipment ug ubang supply may labot sa pakigbatok sa Covid 19. (PAC)