MGA Private Armed Groups ang gitumbok nga suspek sa pagpamomba sa bay sa usa ka lokal opisyal sa Maguindanao.

Sa taho nga nakuha gikan sa Tactical Command Post sa 6th Infantry (Kampilan) Division sa Philippine Army, nasayran nga banda alas 7:40 sa gabii, Marso 22, nahitabo ang pagpamomba.

Gipabuthan og lima ka bala sa 60mm mortar gikan sa wala mailhing mga armadong grupo ang pinuy-anan ni Ampatuan Municipal Mayor Datu Sacaria Sangki.

Ang insidente miresulta sa pagka-igo sa duha ka mga sakop sa opisyal tungod sa mituasik nga shrapnel.

Dali sab nga misibat ang mga suspek dihang namatikdan nga niresponde na ang puwersa sa militar ug kapulisan.

Mga samdang biktima gidali og tabang padung sa Tamondong Hospital sa Isulan, Sultan Kudarat Province.

Kahinumduman sab nga niadtong milabay nga adlaw usa ka Improvised Explosive Device nga hinimo sa bala sa Rocket Propelled Grenade ang gibilin sa Phoenix Gasoline Station nga gipanag-iyahan ni Sangki, apan dali sab kining nadepyos sa mga otoridad.

Dako ang pagtuo ni Maguindanao Police Provincial Director Senior Superintendent Alex Linesses nga kabahin kini sa away sa pamilyang Sangki nga mi-testigo batok sa mga Ampatuan.

Ubay-ubay na ka mga sakop sa militar ug kapulisan ang gipakatag sa utlanan sa Sharief Aquak ug Ampatuan aron mapugngan ang posibleng binalsanay sa magka-away nga pamilya. (Edgardo Fuerzas)