USA ka hairdresser ang gidunggab sa menor de edad sa alas 7:00 sa gabii niadtong Lunes didto sa Saavedra Street, Barangay Bago Aplaya, siyudad sa Davao.
Ang biktima mao si Ramon Subando Jr., 22, nagpuyo sa Bliss, Barangay Bago Aplaya samtang ang suspetsado gitago sa Superbalita sa pangalan nga Joefrey, 15, grade six pupil sa Generoso Elementary School, Barangay Bago Aplaya.
Si Police Officer 1 Kieth Sanchez sa Talomo Police Station nagbutyag sa iyang spot report nga naningil ang suspetsado sa utang sa biktima didto sa Saavedra Street.
Matud ni Sanchez nga wala nagkasinabot ang suspetsado ug biktima kinsa giingon nga nagdumili sa pagbayad sa iyang utang mao nga nagkalalis sila niadtong higayona.
Tungod sa kalagot sa suspetsado, suma sa mga nakasaksi, mikuha siya og kutsilyo dayong gidunggab ang biktima duha ka higayon tumong sa iyang likod.
Si Subando daling gidala sa mga pulis didto sa Davao Medical Center samtang ang suspetsado nasikop sab dayon sa kapulisan.
Si Joefrey atua karon gikustodiya sa Women and Children's Protection Desk (WCPD) sa Talomo Police Station aron hikayon ang iyang kaso.
Ang suspetsado nagpaabot nalang karon sa sunod mando sa kapulisan bahin sa iyang salaod nga nahimo. (AD)