GITUOHANG nangahilo sa gipangkaon nga pie ang upat ka mga batan-on niadtong nilabayng mga adlaw sa Barangay Macasandig ning siyudad sa Cagayan de Oro.

Nilanding sa St. Ignatius Medical Center ang 7 anyos nga si Nicole Sumoroy ug igsuon niining si Juarlito, 12.

Samtang laing duha ka mga silingan nga mao sila si Jhun Mark Plaza, 18 ug Eufemio Miral, 17.

Pulos nadala sa balay tambalanan ang upat ka mga biktima tungod sa grabeng pagsuka, pagkalibang ug pagsakit sa tiyan gumikan sa gikaon nga pie nga napalit gikan sa usa bakery sa maong dapit.

Si Police Officer 3 Charlon Edrote sa Police Station 9 (PS9) sa Macasandig nibutyag sa Sun.Star Superbalita nga ang mga ginikanan sa biktima maoy nitaho sa ilang buhatan aron ireklamo ang nahitabo.

Nasayran nga gikan nga nanihapon ang maong mga bata dihang namalit sa usa ka bakery og pie nga gitawag nga leftover ug kolor pula.

Giingong ang maong pie gihimo sa laing branch niini sa Divisoria nga bahin ning siyudad.

Human sa pagpanihapon mga alas 9:30 niadtong tungora nangaon sila sa maong pie apan pipila ka minuto ang nilabay kalit lang nga misakit pag-ayo ang tiyan sa mga biktima.

Nagsige og suka ug kalibang ug halos mawad-an sa panimuot. Dali nga gidala sa balay tambalanan ang mga biktima ug gituohan nga ang maong pie ang hinungdan sa paglain sa ginhawa labina nga sila lang sab upat ang nakakaon niadtong tungora.

Matud ni Edrote nga gusto lamang sa mga ginikanan sa biktima nga manubag ang maong bakery sa nahitabo sa ilang mga anak ingon man pag-abag sa mga nagasto sa balay tambalanan.

Kini nga kaso giduso sa Brgy Lupon sa Brgy Macasandig aron pagpatawag sa kadagkuan sa maong bakery.