ANAA sa 135 ka mga sakop sa kapulisan ang gidugang karon nga pwersa gikan sa buhatan sa Police Regional Office (PRO)-Northern Mindanao kini aron ipakatag sa kadalanan aron motabang sa implementasiyon sa mga ordinansa sa siyudad kalabot na sa pagbatok sa coronavirus disease (Covid-19).
Nasayran nga ubay-ubay ang mga kamandoan ug ordinansa sa dakbayan labi na sa pagpatuman sa community quarantine sa siyudad sa Cagayan de Oro.
Gibutyag ni Police Lieutenant Colonel Dexter Paje, deputy director for operation sa Cagayan de Oro Police Office (Cocpo), nibutyag nga nagpadayon ang kapulisan sa pag-implementar sa curfew, liquor ban sa mga kadalanan ug social distancing.
"Nakadawat ta og augmentation from regional office, a total of 135 personnel mao ni atong gamiton pag-implement sa social distancing nato nga problema and then liquor ban, and then implementation nato sa Cocpo," matud ni Paje.
Gidugang pa nga kini nga mga personahe ang anaa sa kadalanan ug magsita sa nakalapas sa mga ordinansa labi na sa maglatagaw o mag-istambay lang.
"Karon man gani makita ninyo sa mga kadalanan naay mga police naka standby nga magsita aning atong mga kaigsoonan nga mga walay gipangbuhat mga essential nga business nila," dugang pa.