MOKABAT 892,577 ka pamilya dinhi sa Northern Mindanao ang target nga makadawat og assistance nga Social Amelioration Program nga bag-ong kamandoan ni Presidente Rodrigo Duterte.
Ang maong gidaghanon nga pamilya lakip sa 18 milyones nga lisod nga pamilya sa nasod nga makadawat niini.
Si Charmaine Tadlas, ang tigpamaba sa Department of Social Welfare and Development (DSWD)-Northern Mindanao, nibutyag sa Superbalita Cagayan de Oro nga kini nga programa sa presidente ang duha ka bulan nga ihatag alang lamang niining tubag sa kalisod ning nasinati karon ang krisis sa panglawas nga mao kining coronavirus disease.
Ang kamandoan sa presidente nga P5,000 ngadto P8,000 sa matag pamilya magdepende sa regional minimum wage ug ang Northern Mindanao ubos sa P6,000 nga minimum wage level.
Giklaro niini nga dili tanan cash ang madawat sa pamilya kay kumbinasyon sa food pax nga gibana-banang mokantidad og P2,700 ug ang sobra niini mao ang cash assistance nga motakdo P6,000 nga kantidad.
"Bag-o ni nga mando sa atong Presidente nga balor 2 months ihatag. Kung P6,000 karon nga bulan P6,000 napod sunod bulan," pahayag niini.
Kinsa ang maka-avail?
Ang mga kwalipikado sa Social Amelioration program mao kining senior citizen, persons with disabilities (PWDs), pregnant women, solo parent, overseas Filipino worker (OFW -- distressed ug repatriated), Indigenous People, homeless people, farmers, fisherfolk, self-employed, informal settlers, ug tanan nga Pilipino nga no work no pay sama sa driver, kasambahay, construction worker, labandera, manikurista, ug uban pa.
Giklaro ni Tadlas nga dili lang pokos kini nga programa sa buhatan sa DSWD apan hiniusang pwersa sa nagkalain-laing ahensya sa gobyerno nga haom sa ilang tagsa-tagsa ka benipersaryo.
Sa pagkakaron, kamulo pa magpahigayon og memorandum of agreement (MOA0 signing ang DSWD lakip Department of the Interior and Local Government ug mga local government units sa rehiyon aron masugdan kini dayon sa pagpang-apod.
Kung matapos ang MOA signing, sugdan dayon ang profiling.
Tungod kay bag-o kini nga programa ug alang lang gyud sa Covid-19, kinahanglan ang bag-ong profiling.
Andam na usab ang pundo niini gikan sa national ug pwersa sa Department of Budget and Management (DBM) ug Department of Finance.
Unsaon pag-avail?
Gipasabot ni Tadlas nga aron maka-avail niini, gikinahanglan sa katawhan nga magpuyo sa balay.
"Atong campaign karon nga stay at home so puyo sa sila sa ilang balay ug dili moadto sa bisan asa nga buhatan," matud ni Tadlas.
Maghulat sa opisyales sa barangay nga moadto sa kabalayan ug magdala sa Social Amelioration Card (SAC).
Dinhi sa maong card, i-identify kung kinsa sa pamilya ang haom nga benipisaryo ug maoy makadawat niini.
"P6,000 lang sa matag pamilya bisan pa nga sulod sa ilang balay, naay senior citizen, naay PWDs ug uban pa," matud ni Tadlas.
Giklaro sab niini nga kadtong mga benipisaryo sa Pantawid Pamilyang Pilipino Program (4Ps) ang lakip gihapon sa makadawat niini walay labot ang daan nilang cash grant nga gaihatag kanila matag bulan.
"Ang sa 4Ps diha isulod sa ilang cash card. Kung naa silay madawat kada bulan madugangan kini aning Social Amelioration program," matud ni Tadlas.
Giklaro sab niini nga andam na kini nga pundo ug kinahanglan nga walay pamulitika niini.
Kung aduna man kalangan magdepende gyud kini sa local government unit nga maoy gitahasan nga magkuha sa profile sa matag households.