PANINGKAMOTAN sa lokal nga kagamahanan sa siyudad labi na sa City Social Welfare and Development (CSWD) nga makumpleto na sa pagtunol ang unang hugna sa relief packs alang sa mga katawhan sa dakbayan sa Cagayan de Oro.
Gibutyag sa City Administrator Teodoro Sabuga-a nga ilang paningkamotan nga mahatag na ang unang hugna sa mga hinabang sa katawhan.
"Ang usa sa atong priority karon nagsugod naman ta sa pag distribute sa atong mga relief assistance ug gipaningkamotan nato nga within the week mahuman na ni ang first wave," matud ni Sabuga-a.
Gidugang pa nga niadtong Marso 31, napulo na ka barangay ang natunolan diin pinakaunang duha ka barangay ang nahatagan niini mao ang Barangay 40 ug Barangay Baikingon.
Gi-aghat usab niini ang mga tsirman sa barangay ug barangay council nga mapaspasan ang pagpasa sa profiling aron nga madali usab sa pagtunol ang ayuda.
"Ang makapapaspas pud ani ang tabang pud sa atong mga barangay council ug sa mga kapitanes pinaagi sa pag-submit sa ilang mga profile kay di man pwedi nga dili nato makuha kinsa gyud tong pamilya nga apektado labi na mga pobre," dugang pa.
Giklaro usab ni Michael Christopher Fabello, overseer sa City Social Welfare and Development (CSWD), nga atimanon sa mga barangay ang Disaster Assistance Family Access Card (Dafac) form nga antusan sa paghimo kini gumikan kay kini usab ang posibleng basehan sa Department of Social Welfare and Development (DSWD).
"Manghangyo mi nga ato ni siyang ipasabot ang value sa Dafac nga didto sa field kinahanglan mo encourage kita sa mga Barangay Kapitan ug sa mga residents nga to be true and honest sa pagfill-up sa Dafac form," matud ni Fabello.
Ang madawatan nga relief goods base sa sugyot usab sa punong barangays atol sa Liga meeting ug aron mas lapad o mas daghan ang pamilyang mahatagan sa relief goods sa unang hugna sa house-to-house distribution. Kini na ang sulod sa tanang food packs: 5 ka kilo nga bugas, 5 ka piraso sa noodle, 5 ka lata sa sardinas, 3 ka lata sa corned beef, ug 3 ka lata sa beef loaf.
Ang mahatagan basi sa na-identify nga beneficiaries sa barangay officials. Prayoridad ang mas nanginahanglan. Ang pagpanghatag sa hinabang depende sa supply nga nahuman og preparar.
Gidugang pa niini nga gitakdang hangtod kini unom ka hugna ang pagtunol sa ayuda, ilabi na kung simbako molungtad kini sa pila ka bulan diin unang hugna gikan sa Abril 1-15, Abril 16-30, Mayo 1-15, Mayo 16-30 ug lakip sa Hunyo apan nanghinaot nga dili na kini molungtad nianing mga panahona.
Giingong nigahin na og mga anaa sa P22 milyones alang sa relief goods alang sa mga makabenepisyo niini nga ayuda.
Nasayran nga anaa sa mga 853,410 ka mga indibidwal ang nanimuyo sa dakbayan sa Cagayan de Oro base na usab sa Philippine Statistics Authority diin 9.2 porsyento ang anaa sa poverty incidence rate o mga anaa sa 16,000 ka mga household.