GISUGDAN na sa lokal nga gobyerno sa Magsaysay, Davao del Sur ang pag-apud-apod og tabang sa ilang mga molupyo nga nag-antus sa community quarantine tungod sa coronavirus disease (Covid-19).
Sumala ni Mayor Arthur Davin nga andam na ang mga pagkaon apil ang mga bugas nga na-repack aron mahatud sa mga pamilyang hilabihang naapektuhan sa CQ.
Unang gipuntirya sa LGU ang ilang mga molupyo nga nawad-an og panimalay human mitay-og ang sagunsong linog sa miaging tuig.
Samtang dako ang pasalamat sa lokal nga gobyerno human subling nakadawat sila og tabang gikan kang Davao City Mayor Sara Duterte.
Niadtong Martes, nakadawat na og tabang ang mga molupyo sa mga barangay sa Kanapolo, New Opon, Upper Bala, New Ilocos, Glamang, Malawanit, Bacungan ug Dalumay.
Giklaro ni Davin nga kinahanglang mahatag og tarong ang mga hinabang aron malikayan nga magdasok ang mga tawo ug matuman gihapon ang social distancing protocol.
Sa datus sa Municipal Health Office (MHO), adunay 16 ka persons under monitoring (PUM) ang lugar ug usa niini ang na-cleared na, samtang padayon ang home quarantine sa kinse.
Mokabat sab sa 492 ang persons under monitoring diin 75 ang na-cleared na ug 417 ang padayon nga gi-quarantine. Orlando B. Dinoy