WAGAS ang mga pulong
Nga malibkas sa mga ngabil
Sa batang makililimos
Inig-ingon niya, “Gigutom ko!”
Linghod pa ang iyang hunahuna
Ug ang pagpangayo maoy paagi
Sa pagpakabuhi dinhi ning
Kalibutan diin nagsagol
Ang kabaliko ug katarong
Sa mga batasan sa katawhan.
Wa siyay nailhang ginikanan.
Napunitan siya sa basurahan
Sa babaye nga nagbuhi niya.
Ug dihang nadako-dako na
Ug makalitok nag mga pulong
Gitun-an pagpakilimos sa dalan.
Unsay iyang isulti ug buhaton
Nga makaayo kaniya dili dautan
Basta may ikapakal sa baba
Aron mahumpay ang nagkutoy
Nga tiyan.
Sinalikway sa way puangod
Ug makasasalang inahan
Dili na niya matagamtaman
Unsa katam-is ang gugma
Ug pagpangga sa tinuod
Nga ginikanan.
Gibuhi siya sa babayeng
Bulingon og tanlag.
Gisagop siya kay dunay
Intensyon nga himuong
Instrumento sa panapi.
Kastiguon siya ug kasuk-an
Kon way limos nga ikatunol
Sa palad niini.