GIPAHIBAWO sa Office Of Senior Citizen’s Affairs (Osca) sa dakbayan sa Lapu-Lapu nga dili pa nila mahatag ang mid-year cash assistance sa senior citizens sa dakbayan.
Kini bisan kung aprobado na unta sa konseho sa dakbayan ang paghatag og sayo sa ilang mid-year cash assistance gumikan sa hulga sa coronavirus disease 2019 (Covid-19).
Si Lapu-Lapu City Mayor Junard “Ahong” Chan miuyon na usab sa naasoyng lakang.
Apan pagpasabot ni Carmelita Berame, ang in-charge sa buhatan sa Osca nga nahinabi ning mantalaan nga wala pa gayud mapanday ang guidelines ug mechanics sa ilang buhatan nga angayang sundon sa pagpang apod-apod unya sa cash assitance sa mga senior citizens.
Importante sumala pa kini aron kalikayan ang posibleng panagdasok unya sa senior citizens atol sa hinatagay sa cash assistance ug matuman gihapon ang social distancing.
Gibutyag ni Berame bisan gani karon nga aduna na untay kamandoan sa mga senior citizens nga magpuyo na lang sa balay 24 oras aduna gihapoy misupak niini ug motuyo gyud ug adto sa ilang buhatan aron mangutana kanus-a gayud sila makadawat sa ilang cash assistance.
“Karon lang gani nga pagsulti ni mayor nga iyang gi-approved ang early relaease pwerti na gyud ang calls, moari diri mag-inquire mapuno nang opisina dayon unsaon nato paglikay anang magtapok di unsaon nato nang social distancing,” matod ni Berame.
Usa sa giplanohan mao ang pag-house-to-house sa cash assistance apan gihan-ay aron masigurong di magkagubot atol sa hinatagay sa hinabang sa senior citizens. (GCM)