TUNGOD sa natagamtaman nga krisis sa Coronavirus 2019 (Covid-19), giingong wa kaagwanta ang 44 anyos nga tigmuntar og signage sa pagsulod sa ilegal nga kalihukan human nawad-an og trabaho.
Si Jerome Babao 44, molupyo sa Purok Sambag, Barangay Tisa, siyudad sa Sugbo ang nadakpan sa mga operatiba human gironda niadtong Marso 31, Martes sa gabii sa nahisgutang lugar.
Ang operasyon sa Regional Drug Enforcement Unit (RDEU) 7 pinangulohan ni PCapt. Joffre Grande ug miresulta sa pagkasikop sa target.
Matud ni Grande, nasakmitan og mga pinutos nga shabu si Babao nga mobalor sa kapin P300 mil subay sa Dangerous Drugs Board (DDB) value.
Dugang ni Grande nga pinaagi sa usa ka impormante nadakpan si Babao human nga nagpositibo sa pagpamaligya og drugas hinungdan nga giimplimentar ang pagpangronda kang Babao human napalitan atol sa buy-bust.
Ang dinakpan miangkon sa pagpamaligya sa gidiling drugas tungod sa kakuwangon na sa panalapi human sa pagpahunong sa mga trabaho tungod sa krisis sa Covid-19.
Laing drug personality ang nadakpan niadtong Martes, Marso 31, sa mga sakop sa Drug Enforcement Unit sa San Nicolas Police Station gipangulohan ni PMaj. Eduard Sanchez, hepe sa Station 6.
Giila ni Sanchez ang ilang dinakpan nga si Joel Llamado, 34, molupyo sa Sityo Ermita Proper, Barangay Ermita kasamtangan ga sideline isip habalhabal drayber.
Dugang ni Sanchez, si Llamado nasakmitan og shabu balor P306 mil subay sa iyang DDB value. (BBT)