DI NA mahimong makagawas sa ilang balay ang mga lumolupyo sa Dakbayan sa Sugbo kon walay isul-ob nga face mask sugod karong adlawa, Abril 2, 2020 bisan kon magdala og quarantine pass.
Kini subay sa giluwatan nga Executive Order No. 066 ni Mayor Edgardo Labella isip dugang mga lakang para pagpakigbatok sa pagkuyanap sa Covid-19 sa dakbayan sa Sugbo.
“The wearing of face masks, coupled with proper sanitation and frequent washing of hands with soap and water is among the ways to prevent the transmission and spread of Covid-19,” matod sa EO ni Labella.
Atol sa pagsuwat niining balita, ang Cebu City adunay 21 ka mga kaso sa Covid-19, tulo ang nangamatay.
Sila si City Administrator Floro Casas Jr. ug Konsehal Raymond Garcia nagkanayon nga mahimong mogamit ang libuan ka mga tawo og mask nga malabhan, surgical mask, N95 mask ug uban pang klase sa pangtabon sa baba ug nawong sa higayon nga mogawas sila sa balay.
Ang Philippine National Police maoy gitahasan ni Labella sa pagpatuman sa order, lakip na ang mga barangay official ug ubang mga force multiplier.
Ang officer-in-charge sa Cebu City Police Office, Police Colonel Hector Grijaldo, nagkanayon nga adunay mga pulis nga nadestino sa 80 ka barangay sa siyudad.
Sila maoy nagdumala sa checkpoint sa entrance sa ilang mga barangay ug maoy mopatuman sa EO ni Labella.
Multa
Nalakip sa kamanduan sa mayor mao ang pagpahamtang og penalty sa mga violator nga nagkantidad og P20,000 ngadto sa P50,000 subay sa Republic Act 11332 kun Mandatory Reporting of Notifiable Disease and Health Events of Public Health Concern Act.
Apan giklaro ni Labella nga wa mag-apas ang City Government sa penalty sanglit ang gikinahanglan sa dakbayan mao ang disiplina ug kooperasyon sa mga tawo aron mabatukan ang makamatay nga Covid 19.
Si Grijaldo, sa iyang bahin, niingon nga kon adunay dili mag-mask, dili makalusot sa ilang checkpoint ug pabalikon kini sa ilang gigikanan.
Ang mayor nagkanayon nga kinahanglan nga di moluag sa iyang preparasyon ang Cebu City Government sanglit ang ilang kaaway dili makita.
Wa sila mahibawo kon asa kini moataki para mohimo og dugang mga kadaot sama sa nahitabo sa ubang nasod sama sa Italy, USA ug Spain nga maoy adunay labing daghang og mga kaso ug casualty.
Ang Cebu City gipaubos ni Labella sa Enhanced Community Quarantine para malimitahan ang mga tawo nga mogawas sa ilang mga balay.
Gisirado ang ubay-ubay sa mga establisemento sama sa malls, hotels, ug daghan pang uban para malimitahan ug mapugngan ang pagpaktap sa virus.