MGA taga probinsiya sa Sugbo maoy nidominar sa second elimination round sa niaging adlaw sa nagpadayon nga 1st Sports Exchange 10-Ball Challenge sa Sports Exchange Bar sa Mango Square, Mango Avenue, dakbayan sa Sugbo.

Duha niini nga nakasiguro na og luna alang sa top-16 knockout stage nagagikan sa habagatang bahin sa Sugbo, usa sa Lapulapu City ug ingon man usa gikan sa amihanan dapit.

Lumad nga taga Lilo-an, si Antonio “Calot” Cosi, ang Philippine Team elimination qualifier sa niaging tuig, maoy unang nisalta sa sunod round sa maong adlaw human sa tulo ka makutas nga round nga naagian.

Click here for Election 2010 updates

Nisunod usab gilayon ang taga lungsod sa Naga nga si Edwardo “Dudz” Catabas, dayon ang taga dakbayan sa Lapulapu nga si Melari “Buaya” Baguio. Ang ikapuat nga nikompleto sa top four sa ikaduhang adlaw sa elimination series mao si Ricky Etang nga taga San Fernando.

Ang upat maoy mahidugang sa first day qualifiers nga gilangkuban nila ni Alvin “Bitoy” Avenido, Enrico “Insik” Paragayo, Deo Velez ug Andres “Takuri” Abay.

Subay niini, ang management sa Sports Exchange nga gipangulohan sa tag-iya nga si Kevin Cook nagkanayon nga sugod ugma sa ala 1:00 sa hapon, estrikto nang ipasunod ang pagsugod sa torneyo.

Ang maong kalihukan giayudahan sa Sun.Star-Cebu ug Sun.Star Superbalita, Proteus, Crew Asia, Pacific Electrix Ltd. ug San Miguel.