HANGTOD karon nagpadayon pa ang kalibog sa katawhan sa nagkalain-laing mga local government units (LGUs) nunot niining implementasyon sa enhanced community quarantine (ECQ) sa tibuok isla sa Cebu.
Gumikan kay wala gyuy klarong koordinasyon sa tulo la mga chief executives nga sila si Cebu City Mayor Edgardo Labella, Lapu-Lapu City Mayor Junard Chan ug Gov. Gwen Garcia.
Niadtong miaging adlaw lang sila nagkasabot kabahin sa hatagan og exemption sa ilang tagsa-tagsa ka mga LGUs gumikan kay lain-lain man ang ilang gipagawas nga mga executive orders.Ang mga exempted sa Lapu-Lapu puwedeng makaagi na sa dakbayan sa Mandaue paingon sa Cebu City nga dili na pangayoan og quarantine pass. Igo na ang certification of employment ug mga company IDs.
Pero mga tawo nga dili exempted kinahanglan nga mokuha og quarantine pass aron makagawas sa ilang mga panimalay kon may gikinahanglan sa gawas sama sa pagpalit og pagkaon ug medisina. Daghan intawon taga probinsiya ang wala tuguti nga makasulod sa kinapusuran sa dakbayan sa Sugbo.
Sama sa akong gikaingon sa nangagi natong mga lindog wala kaayo mapreparahi kining maong situwasyon sa wala pa nila gi-implementar ang ECQ.
Kanang dali-dali ba nga desisyon ug wala hunahuna daan kon unsa ang mamahimong resulta o lintunganay sa implementasyon.
Dili lang ang kalibog sa exemption ug distribution sa quarantine pass kon dili ang ayuda sa kagamhanan labi pa niadtong mga sektor nga derektang naapektuhan sa ECQ. Hangtod karon dunay wala pa mahatagi ug makadawat og hinabang kay gipamukitika man sa uban ang hinabang labi pa sa mga barangay kapitan.
Sus, nagpabaga lang sa nawong ang uban. Wala sila makonsensiya sa ilang gibuhat nga gumikan sa ilang pamulitika daghan ang nagutman. (bobbygnalzaro@gmail.com)