UNSA kini ka tinuod kining pasangil batok sa upat ka mga pulis sa lungsod sa Balamban nga usa sa ilang dinakpan atol sa raid sa sugal nga sabong sa kaka giingong ilang gibastrok hinungdan sa kamatayon niini.
Ang tinubdan sa Superbalita Cebu nagkanayon nga kining upat mipahigayon og ronda sa usa ka sudlonong bahin sa Barangay Buanoy niadtong udto sa Dominggo, Marso 29, 2020. Imbis tigbakay ang ilang tuyo, ang sugal sa kaka maoy ilang nasigpitan ug dayon gi-raid.
Matod pa, nga natanggong sa prisohan ang dinakpan nianang adlawa apan sa dihang piyansahan na unta kini pagka sunod adlaw, gipahibawo na lang ang mga partidos nga gihatod kini sa district hospital tungod kay nagsakit ang tiyan niini.
Dugang saysay sa tinubdan, nga human mahikay ang tanang papeles sa pagpiyansa, plano unta sa pamilya nga dad-on kini sa ospital sa siyudad sa Sugbo tungod kay padayon kining nagping-it sa kasakit sa bun-og. Apan nianang Martes sa kaadlawon, sa kalit lang, nahunosan sa iyang kinabuhi ang dinakpan kinsa mao ra unta intawon ang gisaligan sa ilang pamilya.
Tungod niini, hustisya ang gipangayo sa tagtungod. Midangop sila karon sa National Bureau of Investigation (NBI). Giandam na usab nila ang mga medical certificates ug ingon man ipa-autopsy usab nila ang lawas sa biktima.
Dunay kaugalingong bersiyon ang kapulisan sa maong hitabo. Matod pa sa tinubdan nga ang pagkalamba atol sa ginukdanay sa raid mao kunoy hinungdan sa pagkabun-og niini. Tan-awon nato kon mosalir.
Niini, atong hagiton si Cebu Provincial Police Office chief Col. Roderick Mariano sa paghimo usab og ilang kaugalingon ug way lipod-lipod nga imbestigasyon ug di magpanuko sa pagsilot kon mapamatud-ang sad-an kining sa upat. Hinaot pa unta, Colonel.