DAGHAN pang mga patient under investigation (PUI) sa Davao Region ug uban pang bahin sa Mindanao mahimo nang masusi alang sa coronavirus disease (Covid-19) human ang Southern Philippines Medical Center (SPMC) nakadawat og 5,000 ka testing kits gikan sa Department of Health (DOH).
Gibutyag ni SPMC chief Dr. Leopoldo Vega niadtong Martes nga ang SPMC, usa sa giila nga sub-national laboratory sa Research Institute for Tropical Medicine (RITM) nga puwede nang magkaugalingon og susi, gitunolan og dugang testing kits sa nasudnong kagamhanan niadtong niaging semana.
"We have enough test kits. The 5,000 was given to us," tug-an ni Vega.
Ang nahisgutang ospital naggamit og Polymerase Chain Reaction (PCR) tests aron nga makadiparal sa aktuwal nga presensiya sa kagaw.
Makadetermina kini kon ang indibiduwal positibo sa kagaw bisan kon siya "asymptomatic."
Ang hinugpong nga nasopharyngeal (NP) ug oropharyngeal (OP) swabs gikan sa pasyente iproseso sulod sa ilang molecular laboratory. Ang resulta mogawas sulod sa 24 oras.
Ang pagpagamit sa test kits sa rehiyon maoy usa sa mga paagi nga nakita tungod sa kalit nga pagsulbong sa nakompirmang pasyente. Sa ilang lebel, ang SPMC makapagawas na og taho sa makompirmang kaso bisan og wa nay balidasyon sa RITM sa Muntinlupa City.
"Since independent na kami with our results, hindi na namin pinapadala sa Manila for confirmation since we can run almost 60 tests an average per day. We were able to increase our results in terms of positive cases kaya dumami bigla," tin-aw ni Vega.
Apan gisulti ni Vega nga wala kini nagpasabot nga ang ratio alang sa pagsusi mao ang usa ka pasyente sa usa ka testing kits. Giklaro niya nga atol sa ilang unang pagsusi, 58 ka pasyente lang ang nasusi sa 100 ka testing kits tungod kay ang resulta kinahanglan nga ibalik-balik, unya "revalidated" ug kon dunay mga pagduda, mopailawom na sab og laing confirmatory test.
Base sa DOH-Davao Regional Situation Update, sukad 8 sa gabii niadtong Abril 1, ang Davao Region nitala na og 61 kompirmadong Covid-positive nga pasyente. Siyam kanila namatay samtang ang 18 nakarekober.
Ang Davao City maoy nanguna sa pinakadaghan og ihap sa 49 kompirmadong kaso, gisundan sa Davao del Norte nga unom, Davao Oriental (3), Davao del Sur (2), ug Davao de Oro (1).
Sa laing bahin, si DOH Davao Regional Epidemiology and Surveillance Unit chief Dr. Cleofe Tabada nagsulti nga kon gikonsidera nga ang SPMC mao lang ang sub-national laboratory sa Mindanao, ubang mga rehiyon nagsugod na og koordinar kanila ug nagpadala og mga samples sa ilang mga pasyente aron nga masusi.
Sukad niadtong Martes, butyag ni Tabada nga duna nay 69 patient's samples ang giproseso gikan sa Northern Mindanao, Soccsksargen, ug Caraga regions. (Juliet C. Revita)