Malaumon Davao Occidental pabiling 'Zero Covid-19'


DAVAO. Gipahugtan sa Davao Occidental ang kwarentinas karong gipailawom na sa Enhanced Community Quarantine ang lalawigan aron magpabiling "Covid-19-free." Makita ang usa ka personahe nga nag-awhag sa katawhan nga tumanon ang "Stay at Home" nga polisiya. (Orlando B. Dinoy)
DAVAO. Gipahugtan sa Davao Occidental ang kwarentinas karong gipailawom na sa Enhanced Community Quarantine ang lalawigan aron magpabiling "Covid-19-free." Makita ang usa ka personahe nga nag-awhag sa katawhan nga tumanon ang "Stay at Home" nga polisiya. (Orlando B. Dinoy)

MALITA, Davao Occidental -- Si Davao Occidental Provincial Health Officer Dr. Ann Margaux Quezada miapela karon og kooperasyon sa tanang molupyo sa probinsiya nga motabang sa pagpalig-on pinaagi sa pagtuman sa tanang sumbanan aron pabiling "zero Covid-19" ang probinsiya.

Sa usa ka post ni Quesada sa Davao Occidental Facebook page, gipaabot niini kon unsa ka importante ang dili pagpasulod og mga dayo sa probinsiya sanglit dili ordinaryo nga "flu" ang Covid-19 nga mawala dayon sud sa usa ka semana.

Giklaro ni Quesada nga ang Covid-19 usa ka sakit nga hinay-hinay'ng mopatay sa tawo.

Sa lima ka mga probinsiya sa Davao Region, bugtong ang Davao Occidental na lamang ang nagpabilin nga walay nag-positibo sa kagaw.

Gumikan niini, gipatuman na sa probinsiya ang enhanced community quarantine (ECQ) sugod Miyerkules, Abril 1, ug kinahanglan na ang istriktong pag-monitor sa mga utlanang bahin dinhi.

Hugot nga gidid-an na ang katawhan nga mobiya sa probinsiya apan kung aduna man, dili na sila mahimong makabalik samtang gipatuman ang ECQ period.

Hinuon, way labot sa polisiya ang mga indibiduwal nga moadto sa ospital o anaa sa "emergency situation" ug ang mga delivery trucks nga nagkarga og mga basic commodities ug essential goods.

Samtang si Governor Claude Bautista niadtong Marso 30, 2020 nagpaguwa og Executive Order 26, alang sa ECQ guidelines nga ipatuman sugod Abril 1 hangtud Abril 14, 2020 hangtud nga malibkas ang state of health emergency.

Giklaro sa guidelines ang mandatory stay at home order, pagsirado sa tanang establisemento, pagsuspende sa biyahe ug pagpanglimpyo sa palibot sa probinsiya.

Sa datus sa PHO, niadtong Marso 31, adunay siyam ka mga patient under investigation (PUIs) ang probinsiya.

Duha niini na-cleared na samtang ang pito padayong gi-monitor.

Mokabat sab sa 847 ang persons under monitoring (PUMs), 345 kanila ang na-cleared na, samtang 502 ang padayong gi-monitor. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph