TUNGOD sa padayong pagsaka sa kaso sa coronavirus disease (Covid-19) di lamang sa Pilipinas, apan uban pang bahin sa kalibutan, partikular dinhi sa Davao City, si Davao City Mayor Sara Duterte-Carpio mianunsyo nga ipatuman na ang enhanced community quarantine (ECQ) sa dakbayan.
Ang ECQ sugdan sa pagpatuman sa Abril 4, 2020, sugod alas 9 sa gabii hangtud 11:59 sa gabii, Abril 19, 2020, o hangtud kini ilibkas o kaha ipadayon pa.
Subay sa executive order nga gipirmahan sa mayor, kinahanglan ang pagpatuman sa ECQ aron kinatibuk-an nga masumpo ang pagkatag sa kagaw.
Nauna nang nagpagawas og pagpasabot ang lokal nga kagamhanan labot sa ECQ, diin ubos sa kamandoan ang mga mosunod:
1. Wala nay mass transportation; Pipila na lang ka sektor sa mga pribadong kompaniya ang tugutan nga manarbaho, samtang mga nahibiling opisina sa gobyerno nga abli ug tugutang mag-operate mao ang dunay kalambigitan sa disaster, social services, health, ug security.
2. Subay sa giya, did-an na sab nga mamasada ang dyipney, apan dunay libreng sakay sa mga bus. Limitado na sab ang pasakyon sa traysikel, taksi ug pribadong sakyanan. Samtang sa motor, way tugtan nga makaangkas.
3. Sa pribadong sektor, tugutan lang nga motrabaho ang mga empleyado sa mga mosunod: Groceries, supermarkets, wet markets/palengke, food commissaries, food processing ug manufacturing, food delivery services, wholesale food stores, convenience stores, sari-sari stores, hospitals, medical laboratories, pharmacies, drugstores, doctor's and dentist clinics, ubang health personnel/services, bangko ug ATMs, savings and credit cooperatives, money-transfer services ug bayad centers, courier services, ubang delivery services, gas stations, water refilling stations, LPG stations, business process outsourcing/call centers ug mass media outlets.
Tugutan makabukas ang mga restaurant, cafe, eatery o karenderya, food stalls ug mga susama nga klase sa tindahan apan alang na lang sa take-out orders, ug food delivery services.
4. Aron makagawas, dunay ihatag nga Food and Medicine Pass (FM Pass) aron makapalit og pagkaon, medisina o moadto sa ospital.
5. Ipatuman sab ang liquor ban sugod alas 5 sa gabii hangtud alas 8 sa buntag samtang ang curfew, 9 sa gabii hangtud 5 sa kaadlawon.
6. Sa gitugutang makatrabaho, mopakita lang sila og balidong ID.
Ang FM Pass ihatag sa matag balay sa mga purok leaders nga maoy gitahasan sa pagpanghatag niini.