LAING kadungganan ang nasab-it na usab sa Sugboanong skateboarder nga si Margielyn Didal human nga nalakip sa 2020 edition sa Forbes Asia magazines "30 Under 30 Asia" uban sa laing upat ka mga Filipino athletes.
Ang gold medalist sa 2018 Asian Games ug sa 30th Southeast Asian Games, ang usa sa mga 30 ka mga makadawat og pasidungog sa Sports and Entertainment Category, uban ni Carlos Yulo, ang wrold artistic gymnast champion.
Kining tinuig nga pagpanglista sa Forbes miila sa 300 ka nga individual gikan sa 10 ka kategoriya kinsa gikonsiderar nga mga change-makers ug mga mapaagihon nga mga lider nga adunay kaandam ug katakos nga modumala alang sa bisan unsa ang mahitabo sa unahan.
“For the fifth year in a row, our team at Forbes Asia has put together a list of the best talents from the Asia-Pacific region who are tackling just about everything, from AI innovations to online funeral services to stylish pet products,” matod pa sa artikulo nga gipagawas sa Forbes.
Sa 3,500 ka mga nominado, 300 niini ang napili-an ug karong tuiga ang mga gipasidunggan nagpresentar sa 22 ka mga nasod ug nagkalainlaing teritoryo sa Asia-Pacific.
Ang ubang tulo ka mga Filipino kinsa anaa usab sa listahan mao sila si Francis Plaza, founder sa processing platform Paymonggo, Louise Mabolo, founder sa The Cacao Project; ug Breech Asher Harani, usa ka multimedia artist sa Alexandrite Pictures.
Si Didal, lumad nga taga Lahug, dakbayan sa Sugbo, nagsugod sa pagsubang ubos sa paggiya sa iyang amahan nga usa ka panday ug inahan nga usa ka sidewalk vendor.
Unang misulbong ang iyang pangalan sa international scene sa dihang gilangkat niya ang ikawalong puwesto san2018 Street League Skateboarding Series, ang pinaka prestisyusong kompetisyon sa skateboarding sa tibuok kalibutan.
Dayon naka-gold medal siya sa 2018 Asian Games sa Jakarta ug duha ka gold sa 2019 SEA Games sa Tagaytay City.
Sa mga kalampusan nga iyang naangkon, ang 20-anyos nga Didal nahimong Athlete of the Year sa ika-37 nga edition sa Sportswriters Association of Cebu-San Miguel Brewery All-Cebu Sports Awards sa niaging Pebrero. (RSC / JBM)