AKONG ipaambit ang mensahe nga nadawat nako pinaagi sa Messenger niadtong Sabado nga giingong rekomendasyon sa mga psychologists.
Angay na natong likayan ang mga balita bahin sa corona virus total daghan na tag nahibaw-an tungod niini. Ayaw na pangitag dugang kasayuran sa internet kay makaluya lang kini sa imong panghunahuna.
Ayaw na pagpadalag dautang mga balita kay di tanan parehas nimo kaisog og panghunahuna. Basin makadugang kini sa ilang kaguol ug depression.
Paminaw og musika sa imong panimalay. Pangitag mga dula nga makalingaw sa mga bata, basahi silag mga istorya ug tug-ani sa imong mga plano.
Kanunayng panghugas sa mga kamot ug pagbutang og pahibalo aron mosunod ang mga sakop sa pamilya. Ang positibo nga panglantaw ug taras makapalig-on sa immune system samtang ang negatibo nga mga hunahuna makapaluya niini ug daling mataptan sa mga virus.
Labaw sa tanan, hugti ang pagtoo nga molabay ra kining tanang pagsulay ug nga ang tibuok kalibutan anaa sa maayong kamot sa Diyos sa paghigugma ug dili sa pagsilot.
Bendisyonan ka sa Ginoo.
•••
Parehas diay mi og birthday si Vice Ganda. Nalingaw ko sa pagtan-aw nako sa It’s Showtime kay feel nako nga apil ko sa mga greetings para niya.
Lahi sa tanang pagsaulog nako karong tuiga kay wa gyud koy bisita. Nakahatod sab kog para pagsaulog sa santos nga misa sa pasalamat bisan tuod di ko makatambong sa kasaulogan.
Matud pa sa pagya: ‘ang importante buhi.’ Daghang salamat sa nahinumdom.
•••
Kataw-anan kay bisan kon nakapanaad ko sa kaugalingon nga di na mosunod og teleserye sa duha ka higanteng network, wa ko makatuman. Kini tungod kay gi-replay ang mga serye nga putolputol ang pagsunod nako niadtong una.
Sa ABS-CBN, ako karong gisunod ang May Bukas Pa ug Wildflower. Samtang sa GMA 7, ako na sab gisugdan og sunod ang My Husband’s Lover. Kini ug ang pagbuhat sa mga butang nga nataligam-an niadto maoy maayong kalambuan nga nahatag sa Enhanced Community Quarantine sa katawhan.
•••
Kalit nga nipanaw sa laing kalibutan ang presidente sa Entertainment Group (E-Group) nga si Yuri Deldig tungod sa atake sa kasingkasing. Mga pahasubo sa mga kabanay. Pahulay sa kalinaw, Yur!