NIINING panahun sa krisis ubos sa Covid-19, kinahanglang magsabut ang mga political leader kon unsay angay buhaton inay nga magka-sumpaki sa mga lagda ug reglamento nga buot ipatuman sa ilang tagsa-tagsa ka hurisdiksiyon. Ato man gud nga nasayran nga wa mauyon si Gobernador Gwendolyn Garcia sa pag-paagi sa ubang mga tawo gikan sa Cebu City nga buot mobalik sa ilang gigikanan sa mga dapit sakop sa lalawigan sa Sugbo.
Nagtuo ang mga Sugboanun nga nagkasabut na pag-ayo ang atong mga pangulo sa local government units (LGUs) kalabut sa mga lagda ug reglamento nga ilang gipatuman pinaagi sa ilang tagsa-tagsa ka executive order. Ambut og unsay nahitabo nga wa man magkatakdo kining mga executive order sa LGUs.
Dili kini gamay nga panghitabo kay na-desisyonan na baya sa mga mayor kining isyuha. Ambut og unsaon pagsulbad niining maong problema nga mo-insister man gayud ang gobernador nga dili niya pasudlon sa lalawigan ang mga trabahador gikan sa Cebu City. Angay hinumduman nga ang Mandaue City ubos pa sa hurisdiksiyon sa Cebu province. Hinaut pang magkasabut sila si Cebu City Mayor Edgardo Labella ug Gob. Garcia aron pagtakdo niining nagkaba-iwas nilang kasugoan.
•••
Kining Coronavirus 2019 (Covid-19) gigamit na nga isyu sa nagkalainlaing pundok. Ang mga anti-Duterte kusog kaayong mosaway nga hinay kaayo ang aksiyon sa administrasyon batok niining maong sakit. Ang mga tawo nga anti-China daghang gipakatap nga pagsaway sa China apil na gani ang pasangil nga gituyo sa maong nasud ang pagpakatap niining maong virus aron matumba ang ekonomiya sa kalibutan, labi na ang sa U.S., aron kuno sila nalay motunhay nga economic power. Gigamit na usab kini sa Democratic party aron sa pag-atake kang Presidente Donald Trump. Ilang gipunting kanunay ang wa pagpakabana ni Trump sa maong sakit samtang didto pa kini manakud sa China. Karon daghan nang natakdan sa Covid-19 sa U.S. Tungod niining maong isyu, hayan madisgrasya ang re-election ni Trump nga murag sigurado na unta.
•••
Masabut unta nato kining wa pay klarong sistema sa pagpanghatag sa mga hinabang ngadto sa mga tawo nga kwalipikadong makadawat niini. Ang dili nato masabut kining dili pareha sa gidaghanon sa ihatag nga hinabang. Aduna usay mga pasangil nga gipili lang ang mga tawo nga unang hatagan. Gubot pa sa lukot kining panghitabo karon. Wala man gani makasulti kon kanus-a ihatag ang hinabang pinansiyal alang sa mga senior citizen. Pagka-daghang tawo nga nagtrabaho man kuno apan wala may mga alamag. Hahay pulitika!
•••
Niining panahun sa krisis, mangguwa ang tanang klaseng batasan sa tawo. Anaay mga manggiluy-on nga mutampo sa bisan unsay ilang masarang aron lang makatabang sa gobiyerno ug iyang isigkatawo. Mangguwa usab hinuon ang mga mapahimuslanon, mga kiriwan ug mangingilad. Inay motabang aron mahaw-as sa kalisud ang isigkatawo pahimuslan hinuon pag-ayo. Mao ni mga tawo nga dili motuo og gaba. (mannyrabacal1144@gmail.com)